Беларускі дзень рока ў Варшаве: Sciana i Terrakod
Пачатак: 27.04 (20:00)Канец: 27.04 (23:00)
Centralny Dom Qultury
Sciana, адзін з найстарэйшых беларускіх рок-гуртоў, дасць вялікі канцэрт у Варшаве. Новы альбом гурта “My zostaniemsia” будзе прэзентаваны у варшаўскім клубе Centralny Dom Qultury 27 красавіка. Канцэрт у CDQ стане першым вялікім “сталічным” канцэртам гурта з новым гукам (замест саксафону цяпер ді-джэй) і новым альбомам у Польшчы. Разам з Sciana заграе яшчэ адзін гурт з Беларусі – TerraKod – жывы драйв дзяцей Палесся, якія спалучаюць альтэрнатыву і фолк, дысідэнцкую лірыку з народнай мудрасцю.
Sciana вядомая польскаму слухачу найперш як пераможца XII фестывалю Rock-Nocą. Акрамя таго гурт граў у Кракаве, Катовіцах, Аўгустове і іншых гарадох, ахопліваючы сваімі канцэртнымі трасамі ў роўнай ступені Беларусь, Польшчу і Украіну. Беларуска-украінская песня “Нашыя краіны Беларусь ды Украіна”, запісаная з гуртом Rolliks, стала адным з сімвалаў славянскай еднасці і пошуку самаідэнтыфікацыі як беларусаў, так і украінцаў.
Aльбом “My zastaniemsia“ выйшаў у канцы 2013га году як «энэргічная і глыбокая плытка». Першы канцэрт адноўленага складу гурта адбыўся ў Мінску на рок-фестывалі Даем Рады, дзе гурт намінаваўся на гурт году і прадэманстраваў ужывую, чаго варты. Пасля канцэрту ў Варшаве гурт вяртаецца з канцэртамі ў Беларусі – у Мінску і рэгіёнах.
TerraKod – гэта жывы драйв дзяцей Палесся, якія заварылі альтэрнатыву і фолк. Гурт выконвае цяжкую гітарную музыку з нязменнай дудой і гендэрна роўнай вакальнай парай наперадзе. Група пачалася як жывы “all stars band” музыкаў з Берасця і стала пераможцай фестываляў Sound of Borderland 2012 (PL) і Men’s Fest 2011(BY). Паспяхова выступала на ўсходнееўрапейскіх фестывалях Zahid, Basowiszcza, Bandersztat, Kupalskaje Kola і ў якасці хэдлайнера на беларускім Men’s Fest 2012.
Найбольш вядомы праз свае жывыя акты, гурт не адмаўляецца ад студыйнай дзейнасці – быў запісаны EP “TRKD”, а зараз поўнай хадою ідзе праца над паўнафарматным альбомам. Першы сінгл з будучага альбому, “Мята”, з’яўляецца прысвячэннем Эрнэсту Хэмінгуэю. Рэліз утрымлівае дзве версіі галоўнай песні – беларускую і польскую, а таксама канцэртны баевік “Брудныя танцы”. Сінгл дае зразумець, якім будзе лонгплэй: грув, дуда і брудныя танцы.
