Вітаем у новым годзе ўсіх, хто перажыў страшны пэрыяд бясконцых пераздач залікаў, карпаратываў і бяседаў!
Пад сакрэтам паведамляем, што на першай вечарыне 2018 году будзем жаніць Цярэшку!
Магчыма, да нас яшчэ завітае Каляда.
Таксама павесялімся пад мікс танцаў народных ды інародных, мала-, многа- і сярэднявечных, беларускіх і буржуінскіх, этнаграфічных і сацыяльных.
Адным словам, час калядных цудаў!
Калі:
10 студзеня (серада)
дзьверы адчыненыя з 18:30;
пачатак а 19:00
Дзе:
клюб “BRUGGE” (пр-т Партызанскі, 6А)
Увага:
УВАХОД ВОЛЬНЫ!
* * * * * * * * * * * * * * * * * * * * * *
Даведка:
«Жаніцьба Цярэшкі» — унікальная традыцыйная абрадавая гульня нежанатае моладзі, што дасягнула шлюбнага веку. Сэнс гульні палягае на магчымасьці праявіць сваю прыхільнасьць для знаёмства, знайсьці сабе пару. Магчыма, раней гульня мела больш «сур’ёзны» характар і была своеасаблівай «рэпэтыцыяй» запраўдных вясельляў. Узрушанасьць і весялосьць характэрныя для «Жаніцьбы Цярэшкі», што ладзілася каляднымі вечарамі ў хаце ці карчме.
* * * * * * * * * * * * * * * * * * * * * *
Сябры!
Гэты сэзон музычна-танцавальных сустрэчаў мы хочам зрабіць з ВОЛЬНЫМ УВАХОДАМ ДЛЯ ЎСІХ!
Гэта дазволіць пашырыць аўдыторыю, уцягнуць у дударскі й танцавальны рух новых людзей.
Натуральна, вечарыны вымагаюць грашовых выдаткаў (арэнда, праца гукарэжысэра, паліва музыкам, ганарары запрошаным калектывам).
Таму кожны, хто хоча, каб гэты сэзон прайшоў годна й не абмежаваўся 2-3 вечарынамі, можа падтрымаць яго на краўдфандынгавым сайце або на вечарынах “у шапку”.
Усе падрабязнасьці тут.
