Літаратура Іншае Вечарыны
Канец: 08.01 (17:00)
Ганна Янкута і Ігар Крэбс у Гданьску
Пачатак: 08.01 (11:00)Канец: 08.01 (17:00)
У нядзелю, 8 студзеня, у Гданьску — сапраўдны дзень беларускай літаратуры! Будзе адразу дзве сустрэчы з перакладчыкамі і літаратарамі Ганнай Янкутай і Ігарам Крэбсам — адна для дзетак, другая для дарослых.
Аб 11-й спадарыня Ганна і спадар Ігар завітаюць на занятак «Мовы Нанова» для дзетак.
Ігар Крэбс пачытае па-беларуску фрагменты з кнігі нямецкага пісьменніка Марка-Увэ Клінга пра сына Дзеда Мароза і пра тое, ці захацеў ён прадоўжыць «дзед-марозаўскія» традыцыі сваёй сям’і.
А Ганна Янкута прэзентуе свае кнігі пра прыгоды ката Шпрота, пра дзяўчынку Марту, якая марыла пра снег, і пра Казачнае воднае агенцтва (КВА), якое дапамагае людзям берагчы ваду. А яшчэ — новую гісторыю пра тое, як маленькі кот Шпрот трапіў у дом да сваіх гаспадароў. Неўзабаве будзе кніга!
Усе дзеткі атрымаюць тэставую староначку з гэтай кнігі для расфарбоўвання. Уваход вольны, але ж раім на ўсялякі выпадак запытацца пра запіс на ўдзел праз дырэкт Таварыства беларусаў на Памор’і.
Дата: 8 студзеня
Час: 11.00 (час мясцовы)
Месца: офіс Таварыства, ul. Malczewskiego 21, Сопат
А 15-й жа ў Еўрапейскім Цэнтры Салідарнасці адбудзецца творчая сустрэча з Ганнай Янкутай і Ігарам Крэбсам. Толькі для дарослых!
Спадар Ігар прэзентуе два найноўшыя выданні з серыі «Гебраістыка Беларусі», якія нядаўна выйшлі ў Мінску (выд. Раман Цымбераў):
«Старую новую зямлю» Тэадора Герцля — утапічны раман, у якім прапануецца падыход да рацыянальнага і абачлівага выбудоўвання дзяржавы і ўсіх дзяржаўных інстытутаў. Супадзенне з назвай паэмы Якуба Коласа «Новая зямля» тут не выпадковае: творы з’явіліся ў адну эпоху і адлюстроўваюць агульны дух часу, імкненне да самавызначэння і пошуку месца ў свеце, якое можна будзе з пэўнасцю назваць «сваім».
«Габрэйскія мелодыі» Генрыха Гайнэ — іранічны і ўзнёслы цыкл вершаў нямецкага класіка, прысвечаны габрэйскай тэматыцы. Вершы суправаджаюцца грунтоўнай прадмовай і каментарамі біблеісткі, кандыдата філалагічных навук Галіны Сінілы.
Спадарыня Ганна прэзентуе свой зборнік вершаў «Канстытуцыя», які асэнсоўвае галоўны беларускі закон. Уваход вольны!
Дата: 8 студзеня
Час: 15.00 (час мясцовы)
Месца: Еўрапейскі Цэнтр Салідарнасці (зала 3.19), Plac Solidarności 1, Гданьск
