22 лютага ў мiнскiм «АРТкiнaтэатры» (пр-т Дзяржынскага, 104, ст.м. «Пятроўшчына») пройдзе другі кінапаказ праекта «Сваё Кіно». Глядзім і абмяркоўваем фільм «Аномія» (Расія, 2016) выхадца з Магілёва, пісьменніка і рэжысёра Уладзіміра Казлова.
Што такое «Сваё Кіно»?
Праект «Сваё Кіно» – гэта паказы новага беларускага кіно, нетрывіяльнага, якаснага і своеасаблівага, а таксама жывы кантакт, знаёмства і дыскусіі гледачоў з аўтарамі, крытыкамі і героямі карцін.
«Сваё Кіно» – гэта i ігравое, і дакументальнае кіно, і анімацыя. Галоўны прынцып – фільм створаны беларусамі або так ці інакш звязаны з нашай краінай, яе мінулым, сучасным і будучым.
Гэта паказы для ўсіх, каму цікава добрае, займальнае кіно, якое падымае пытанні і асвятляе праблемы. Асноўная мэта праекта «Сваё Кіно» – змяніць стаўленне шырокай публікі да сучаснага беларускага кіно, дапамагчы айчынным аўтарам знайсці свайго гледача, убачыць тэмы і праблемы, цікавыя тут і цяпер.
Паказы праекта «Сваё Кіно» праходзяць штомесяц на працягу ўсяго года ў камфартабельным сучасным кінатэатры. Праект вырашае праблему з выхадам беларускіх фільмаў і іх аўтараў да сваёй публікі.
Вядучы – Антон СIДAРЭНКА, журналіст, кінакрытык, аўтар блога на kinopark.by, заснавальнік кінаклуба «Феномены кіно» ў кінатэатры «Ракета».
«АНОМІЯ»
Расія, 2016
Рэжысёр і аўтар сцэнарыя Уладзімір Казлоў
У галоўных ролях: Юлія Яльцова, Дар’я Селязнёва, Андрэй Варанiцын
Хронаметраж: 67 хвілін
«Аномія» – трэці ігравы фільм пісьменніка і рэжысёра Уладзіміра Казлова. Здымкі прайшлі ў Калінінградзе ў лістападзе 2015 года. Як і дзве першыя стужкі рэжысёра, «Аномія» знята без удзелу дзяржавы і кінаіндустрыі, з мінімальным бюджэтам. У фільме занятыя ў асноўным непрафесійныя акцёры.
«Аномія» – карціна пра маладых людзей, якія жывуць без маральных арыенціраў, у грамадстве, не здольным даць ім нормы і стандарты паводзін. У выніку яны кіруюцца толькі сваімі эмоцыямі ды інстынктамі.
Фестывалі і ўзнагароды
Нацыянальны кінафестываль «Рух» (Омск)
Варшаўскі міжнародны фестываль – спецпрыз журы конкурсу Free Spirit
Міжнародны кінафестываль у Мангейме і Гейдэльбергу
Усерасійскі кінафестываль «Поўны арт-хаус» (Чэлябінск)
Трэйлер фільма: https://goo.gl/bO4Hkj
Уладзімір Казлоў
Нарадзіўся і вырас у беларускім горадзе Магілёве. Аўтар больш за дзясятак кніг прозы і нон-фікшн, у тым ліку «Гопнікі» (2002), «Дадому» (2010), «1986» (2012), «Свабода» (2012) і «Вайна» (2013 года). Уладальнік прэміі «Зроблена ў Расіі» праекта «Сноб» у катэгорыі «Літаратура» (2013 года). Шорт-лістар і лонг-лістар шэрагу літаратурных прэмій. Суаўтар сцэнарыя фільма «Гульні матылькоў» (2004, рэжысёр Андрэй Прошкін). Аўтар сцэнарыя і рэжысёр поўнаметражных фільмаў «Дзясятка» (2013), «Сляды на снезе» (дакументальны, 2014), «Скура» (2015), «Аномія» (2016).
Афіцыйны сайт: www.vladimir-kozlov.com
Крытыкі пра фільм:
«“Аномія” – хорар ціхі, непрабудны. Калі яго папярэднік – фільм Германікі – скасаваў наіўнае “перабудовачнае” пытанне “Ці лёгка быць маладым?”, то карціна Казлова вяртае стану маладых невыносную лёгкасць існавання».
Зара Абдулаева, «Мастацтва кіно»
«Казлоў, як калісьці Кіра Муратава ў “Астэнічным сіндроме”, ставіць дыягназ усяму грамадству, падымаючыся – без бачных высілкаў, не выходзячы за рамкі бытавой крымінальнай гісторыі – да глабальных абагульненняў. Тут ёсць фіксацыя аднаго з сімптомаў аноміі – “нізкай ступені ўздзеяння сацыяльных нормаў на індывідаў і іх слабую эфектыўнасць у якасці сродку нарматыўнай рэгуляцыі паводзін”, ёсць дакладны вобраз Расіі нашых дзён – бясконцага гіпермаркета, напоўненага броўнаўскім рухам чалавечых часціц».
Вадзім Руткоўскі, «Сноб»
«…Зусім трэндавы, актуальны фільм – падобна, муратаўскі “сусвет” гасцінна прытуліў “бяздомных” дзяцей, якія часам хочуць сэксу, а часам не хочуць наогул нічога».
Сяргей Сычоў, FilmPro
Квiткi: 6-7 BYN, bycard.by
