12 лістапада спаўняецца 95 гадоў з дня нараджэння народнага пісьменніка Беларусі, лаўрэата Дзяржаўнай прэміі імя Якуба Коласа і Літаратурнай прэміі імя Янкі Купалы, драматурга Андрэя Ягоравіча Макаёнка. З гэтай нагоды 11 лістапада ў 14.00 у Гомельскай абласной бібліятэцы адбудзецца літаратурная вечарына «Каб людзі не журыліся…».

Макаёнак – цэлая эпоха ў беларускай драматургii.

Мастак яркага, непаўторнага таленту, ён творча развіў многія жанравыя традыцыі беларускай драматургіі, узняў узровень айчыннай камедыяграфіі да лепшых сусветных узораў. Яго п’есы – сапраўдная айчынная класiка, наша бясспрэчнае багацце. На працягу двух дзясяткаў гадоў яго п’есы ставiлi трыста тэатраў Савецкага Саюза i амаль усе вядучыя тэатры краiн Усходняй Еўропы.

Пісьменнік нарадзіўся ў вёсцы Борхаў Рагачоўскага раёна Гомельскай вобласці ў сялянскай сям’і. У час Вялікай Айчыннай вайны ўдзельнічаў у баях на Крымскім фронце. Быў цяжка паранены.

Друкавацца пачаў з 1946 года. Аўтар п’ес «Каб людзі не журыліся», «Выбачайце калі ласка», «Лявоніха на арбіце», «Зацюканы апостал», «Трыбунал» і многіх іншых.

Шмат гадоў прайшло з таго часу,  як яго не стала. Тым не менш, ён па-ранейшаму жыве. Жыве ў літаратуры. У тэатры. У нацыянальнай культуры. У нашых сэрцах. Жыве таму, што Макаёнак – гэта з’ява. З’ява не толькі ў жыцці нашай краіны, але і ўсяго свету.

У вечарыне прымуць удзел старшыня Гомельскага абласнога аддзялення ГА «Саюз пісьменнікаў Беларусі» Уладзімір Мікалаевіч Гаўрыловіч, пісьменнік, драматург, член Саюза пісьменнікаў Беларусі Васіль Юр’евіч Ткачоў, загадчык кафедры беларускай літаратуры Гомельскага дзяржаўнага ўніверсітэта імя Ф. Скарыны, прафесар Іван Фёдаравіч Штэйнер, выкладчык Гомельскага дзяржаўнага ўніверсітэта імя Ф. Скарыны, кандыдат філалагічных навук Віктар Іванавіч Яцухна.