Канферэнцыі па гісторыі гандлю ў Беларусі

Другая міжнародная навукова-практычная канферэнцыя «Гісторыя гандлю ў Беларусі» зробіцца не толькі вяхой у ажыццяўленні аднайменнага навуковага праекта, але і важнай навуковай падзеяй для даследчыкаў гандлю.

Калі мэтай першай канферэнцыі, якая адбылася ў 2013 годзе, было выяўленне стану вывучанасці гісторыі гандлю ў Беларусі, то на другой канферэнцыі даследчыкам прапануецца засяродзіць сваю ўвагу на канкрэтнай навуковай праблеме – гандлёвай дзейнасці людзей. Мы заклікаем да рознабаковага вывучэння гандляроў, іх навыкаў і ўменняў, вопыту і традыцый – таго, што складала майстэрства іх дзейнасці. Магчыма, канферэнцыя пасадзейнічае развіццю такіх слабавывучаных у беларускай гістарыяграфіі напрамкаў, як антрапалагічная гісторыя і гісторыя мікраэканомікі.

Вывучэнне азначаных тэмаў мае важнае практычнае і грамадскае значэнне. Гісторыя гандлю можа даць сучасным прадпрымальнікам нямала прыкладаў паспяховай гандлёвай дзейнасці ў мінулым, натхніць іх на творчы пошук новых альбо даўно забытых метадаў і прыёмаў гандлю, напоўніць аптымізмам і гонарам за сваіх папярэднікаў.

Вітаюцца таксама працы, прысвечаныя буйным праблемам гісторыі гандлю. Сярод іх – методыка і метадалогія даследавання, крыніцазнаўства і гістарыяграфія дадзенай тэмы. Актуальным застаецца вывучэнне замежнага досведу даследавання гісторыі гандлю. У 2015 годзе ўдзел у працы канферэнцыі возьмуць як беларускія навукоўцы, гэтак і даследчыкі з Вялікабрытаніі, Ізраілю, Расіі, Украіны.

Канферэнцыя пройдзе 21-22 лістапада 2015 г., па адрасе: г. Мінск, вул. Кірылы і Мяфодзія, 6 (гатэль “Манастырскі”).