У ноч з 2 на 3 ліпеня на аграсядзібе «Запаведны востраў», што на Глыбоччыне, святкуюць Купалле і запрашаюць усіх далучацца.
Дата: 2 ліпеня
Час: з 16.00
Месца: аграсядзіба «Запаведны востраў», вул. Палявая, 17, вёска Шо, Глыбоцкі раён, Віцебская вобл.
РАСКЛАД СВЯТА:
16.00 — пачатак падрыхтоўкі;
18.00 — 19.00 майстар-клас па купальскіх песнях для дзяўчат і жанчын;
21.00 — 22.00 абыход вёскі Хралы з Купалкай (удзельнічаюць усе дзяўчаты ў строях і вянках, у канцы працэсіі могуць далучыцца ахвотныя);
22.00 — 01.00 запальванне вогнішча, карагод, частаванне традыцыйнымі купальскімі стравамі, гульні, танцы;
01.00 — 4.35 вольны час: можна пайсці спаць, ці купацца, ці шукаць папраць-кветку;
4.35 — сустрэча ўзыходу сонца, пусканне вянкоў па вадзе.
Па патрабаванні купальскага абраду кожны прымае пасільны ўдзел у падрыхтоўцы і правядзенні свята.
Таму хлапцоў ды мужчын просяць дапамагаюць складаць купальскае вогнішча (вазьміце з сабой, па магчымасці, неабходныя інструменты для нарыхтоўкі дроў).
А дзяўчатам ды жанчынам неабходна будзе сабраць зёлкі і кветкі, каб упрыгожыць слуп з колам і зрабіць сабе вяночкі (для гэтага вазьміце з сабой ніткі, стужкі, нажніцы).
Падчас свята будзе частаванне традыцыйнымі купальскімі стравамі (крупнік, сыр, кулага). Прадукты для прыгатавання гэтых страў збіраюць «у складчыну», таму прывозьце кожны, што можа: хлопцы — гарэлку на крупнік; дзяўчаты — тварог; усе, хто могуць — мёд, ягады, духмяныя зёлкі.
На свята пажадана апрануць традыцыйны строй, калі ж яго няма, то было б добра, каб дзяўчаты былі ў спадніцах ці сукенках, а хлопцы ў светлых кашулях ці майках.
Арганізатары нагадваюць: калі разгараецца вогнішча — нельга разрываць кола і стаяць убаку. У гэты адказны момант удзельнікі павінны быць усе разам!
Чакаюць усіх ахвотных!
