Лекцыя пра беларускі іканапіс у Гомелі

9 красавіка філіял Веткаўскага музея ў Гомелі запрашае на цудоўную лекцыю «Дабравешчанне. Ікона Яфіма Андрыянава 1880 г. Прастора Веткаўскай іконы».

Дата: 9 красавіка

Час: 13.00

Месца: філіял Веткаўскага музея, плошча Леніна, 4а, Гомель

Лектарка — Галіна Нячаева, заслужаны дзеяч культуры Рэспублікі Беларусь.

Мы ўспрымаем абраз як малельны вобраз, як мастацкі твор у цэласнасці яго сродкаў, як вяху ў гісторыі стылю, этап развіцця лакальнай традыцыі — і почырк майстра, яе аўтара.

Аднак ікону можна разгледзець і семіятычна, у аспекце ідэй. Напрыклад, гэта прасторавая мадэль свету, мадэль прасторы — часу і спосаб увасабленні яго адзінства. Гэта прастора сімвалаў, званая іератопіяй, і тут неабходна паглыбіцца ў гісторыю сюжэту, да візантыйскіх узораў, і тапалогію, сімвалічную геаметрыю.

У сучасным дыскурсе ікону можна разгледзець як суму фрэймаў — алгарытмаў разгортвання інфармацыі і як яе уласны дыскурс — разгортванне тэксту ў нябачнай атмасферы спараджэння яго сэнсаў.

У гісторыі візуальнай культуры ікона — унікальны механізм увасаблення ланцуга падзей у адзінай прасторы, прататып кіно і мастацтва авангарда.

Нарэшце, веткаўскае «Дабравешчанне» — гэта сферычная прастора, якая нанова ўвасабляе старажытную выяву і архетып чашы.

А сапраўды — як выражаны гэтыя сэнсы ў адным толькі абразе?

Пра гэта і пойдзе гаворка на лекцыі.