“Найвялікшы з усіх юбілеяў, які здольны змяніць фокус нашага самаразумення, надаць нам сілы і веры, з’яднаць і акрыліць”
Ірына Дубянецкая
3–7 жніўня 2017 года Беларускі Калегіюм запрашае ў навуковае падарожжа ў Прагу з Ірынай Дубянецкай.
У 2017-м годзе Беларусь адзначае адну з найважнейшых дат сваёй гісторыі і культуры – 500-годдзе беларускай друкаванай Бібліі, пачатак беларускага і ўсходнееўрапейскага кнігадруку.
Такое падарожжа можа адбыцца толькі аднойчы!
Мы апынемся там, дзе ўсё пачалося.
І ў той самы дзень…
Ірына Дубянецкая — біблііст, доктар тэалогіі, доктар філасофіі, Акадэмічны дырэктар Беларускага Калегіюма.
“6 жніўня 1517 году — у дзень Перамянення Гасподняга — Францішак Скарына абвясціў Перамяненне для свайго народу: ён даў сваёй краіне друкаваную кнігу і тым самым улучыў яе ў еўрапейскія цывілізацыйныя зрухі , і больш за тое, ён даў сваім людзям Біблію — асноўны аб’яднаўчы тэкст Заходняга свету — на мове, набліжанай да народнай, і тым самым паставіў сваю культуру на самы перад тых цывілізацыйных зрухаў”.
Ірына Дубянецкая, “Дзеяслоў” №1 – 2017 (86)
Падчас вандроўкі па чэшскай Празе мы з вамі наведаем мясціны, дзе 500 гадоў таму жыў і працаваў беларускі першадрукар Францішак Скарына.
А 6 жніўня мы далучымся да шэсця, якое ладзіць пражская беларуская супольнасць!
Мы пройдзем па Старамесцкай плошчы ў гістарычным цэнтры Прагі, пабачым Астранамічны гадзіннік на ратушы, пабачым той самы будынак, дзе, магчыма,, выйшла у свет першая друкаваная беларуская кніга, пройдзем па незраўнаным Карлавым мосце, убачым гатычны Сабор Святога Віта у Пражскім Градзе.
Наведаем Каралеўскія сады і паркі Прагі, якія былі закладзеныя каралеўскм садоўнікам Францішакам Скарынам. Адведаем два помнікі Скарыну ў Празе, адзін з якіх у колішнім Клементынуме – славутай езуіцкай акадэміі, дзе ў 17 стагоддзі вучыліся Язэп Вельямін Руцкі і Рафал Корсак.
Мы нават зможам пачаставацца мясцовымі напоямі ды прысмакамі ў карчме «У крале Брабанскего», блізу якой быў пражскі дом Скарыны. Ён яе напэўна ведаў і ў магчыма наведваў 500 гадоў таму!
І мы адчуем да сваім досведзе, што Прага любіць і захоўвае сваю гісторыю.
Таксама наведаем шмат іншых месцаў, насычаных беларускім духам – бо Прага ва ўсе часы давала прытулак нашым суайчыннікам, сярод якіх урадоўцы БНР, беларуская ўлюбёнка паэтка Ларыса Геніюш, легендарны спявак Міхась Забэйда-Суміцкі, Васіль Быкаў…
А таксама мы даследуем Прагу як адзін з найпрыгажэйшых гарадоў свету, чароўнае і містычнае места, дзе спалучаюцца, некранутыя часам і бяздумнымі адносінамі, розныя архітэктурныя стылі – часта ў межах аднога будынку! І дзе ўсе старыя дамы (а іх там не пералічыць) маюць свае легенды і гісторыі. А самае галоўнае, мы нават зможам пабачыць, якой была і магла б быць Беларусь – бо многія і многія ідэі, дэталі, вобразы архітэктуры і горадабудаўніцтва былі такімі самымі, як і ў нашай амаль дашчэнту зруйнаванай даўніне.
Па Празе з намі прагуляецца выдатны гісторык і літаратар выкшталцоны Сяржук Абламейка.
Па магчымасці адведаем адзін з чэшскіх замкаў, кожны з якіх – архітэктурны шэдэўр і гісторыка-кулькурная пэрліна…
Падчас мы будзем шукаць адказы на шэраг вострых пытанняў, звязаных з жыццем, сутнасцю дзейнасці і поглядамі Францішака Скарына, а таксама пытанняў, звязаных з беларускай гісторыяй ды фармаваннем сучаснай беларускай ідэнтычнасці. Вось некаторы яз іх:
- Чаму можна назваць 1517 год – пачаткам беларускай ідэнтычнасці;
- Якое значэнне адыгралі пераклады Бібліі ў культуратворчых і нацыятворчых працэсах Еўропы і чаму так важна, што першай беларускай кнігаю была Біблія;
- Як ідзе працэс перакладу Бібліі ў нашыя часы;
- Што дало Беларусі 16 стагоддзе і што Беларусь 16 стагоддзя дала свету;
- Чаму Беларусь сышла з еўрапейскага шляху, які праклаў для яе Скарына;
- Што значыць перарваная традыцыя для сёняшняй Беларусі.
Кошт – 195 еўра + 35 BYN
Візы для ўдзельнікаў падарожжа бясплатныя.
Сюды ўключаны: транспартныя паслугі, пражыванне ў гатэлі і сняданкі, экскурсійнае абслугоўванне, медыцынская страхоўка.
Падарожжа пачнецца ў чацвер увечары 3 жніўня – з тым, каб пераехаць мяжу і заначаваць ў Польшчы, а раніцай 4 жніўня выехаць у Прагу. Такім чынам ўвечары таго ж дня Прага будзе нашаю! Вяртаемся ў панядзелак 7 жніўня. Праезд у камфортным аўтобусе.
Калi вы ўжо вызначылiся адносна свайго ўдзелу ў падарожжы, то лiстуйце на padarozzy@navukovyja.by
