Рэжысёр: Аляксандр Марчанка
Драматург: Віталь Каралёў
10 снежня ў 19:00
75 хвілін (без антракту)
Месца правядзення: Ок16 (вул. Кастрычніцкая, 16)
Белы кабінет, які асвойвае рэжысёр Аляксандр Марчанка замест звыклай для беларускага тэатра «BlackBox» прасторы, – гэта прапанова альтэрнатыўнага погляду на магчымасці сучаснага тэатра. Спектакль «Опіум» прапануе паглядзець у люстэрка і ўбачыць там знаёмы свет «жыцця звычайнага». Людзі, абцяжараныя штодзённымі клопатамі і праблемамі – што можа быць прасцей? У той жа час, што такое паўсядзённая рэальнасць: нязначная прыватнасць або асноватворнае звяно? Няпростыя стасункі ў сям’і, пошукі працы, мары пра лепшае жыццё – усё гэта уключана ў рэжым выжывання ва ўмовах звычайных, звыклых для постсавецкага чалавека.
У сучасным беларускім тэатры і драматургіі ўсё часцей гучаць праблемы простага чалавека, сацыяльны кантэкст становіцца не толькі фонам, але штуршком да развіцця канфліктаў. Героі спектакля змагаюцца за рэчы натуральныя і неабходныя, барацьба даецца нялёгка, а судзіцца не заўсёды справядліва. Тэатр – гэта спосаб размовы, гэта інструмент, з дапамогай якога стваральнікі спектакля звяртаюцца да гледачоў, каб разабрацца ў рэальным свеце і пачуць галасы з адваротнага боку рампы.
Першы спектакль, створаны пры падтрымцы гледачоў і платформы ulej.by.
Лепшы беларускі спектакль 2016 года па версіі крытыкаў.
Лепшы спектакль «малой формы» XXII Міжнароднага тэатральнага фэсту «Белая Вежа».
