Што горад Магілёў можа прапанаваць сваім жыхарам, каб у вольны час падняць людзей з канапаў, “выцягнуць” з дачы, адарваць ад экранаў шматлікіх дэвайсаў? Што трэба зрабіць, каб культурніцкае жыццё горада зрабілася насычаным, а людзі – зацікаўленымі? Чый гэта абавязак ці функцыя – уладаў, бізнесу, грамадскіх ініцыятываў ці творцаў – стваральнікаў культурніцкага прадукту? Такія пытанні для афлайнавага ток-шоу ў летні пятнічны вечар прапануе грамадская культурніцкая кампанія “Будзьма беларусамі!”.
Нагодай для абмеркавання стала… гарадская афіша Магілёва, прадстаўленая найперш паказамі кінатэатраў горада, што сведчыць пра тое, што жыццё гэтага абласнога цэнтра не перанасычанае культурнымі ды забаўляльнымі падзеямі, асабліва ўлетку.
Асноўныя тэзы размовы:
Невялікая колькасць інфармацыі пра культурныя мерапрыемствы ў горадзе – гэта вынік адпаведнай колькасці прапановаў ці адсутнасць камунікацыйных здольнасцяў/магчымасцяў арганізатараў?
Разнастайнае, камунікацыйна насычанае і інтэрактыўнае напаўненне падзей і паслуг – сусветны трэнд, але ці патрэбна гэта магілёўцам?
Хто фармуе і хто адказвае за грамадскі культурніцкі густ і культуру адпачынку горада?
Запрошаныя эксперты:
- Гары Рыгоравіч Есялеўскі, кіраўнік студыі класічнай гітары “Рэнесанс” Цэнтра творчасці “Эверэст”;
- Зміцер Луцко, адміністратар антыкавярні “Чердак”;
- Людміла Мацкела, вядучы рэдактар Магілёўскай абласной філармоніі;
- Вадзім Мязга, спявак, прадпрымальнік у індустрыі забаваў.
Да адкрытага абмеркавання запрашаюцца дзеячы культуры і мастацтва, прадстаўнікі культурніцкага/творчага бізнесу, індустрыі забаваў, грамадскія актывісты, прадстаўнікі адміністрацыі горада, журналісты і ўсе неабыякавыя да культуры адпачынку ў Магілёве!
Афлайнавае ток-шоу адбудзецца 25 ліпеня а 18-й у антыкавярні “Чердак” па адрасе: вул. Ленінская, 7, 3 паверх.
Уваход вольны!
