Выстава «Формы і цені: Жаночае» ў Мінску (12+)

У пятніцу, 17 красавіка, у Нацыянальным цэнтры сучасных мастацтваў адкрываецца выстава «Формы і цені: Жаночае».

Жыццё кожнай жанчыны — гэта складанае перапляценне міфаў, гістарычных наратываў, уплыву масавай культуры, стандартаў прыгажосці і сямейных традыцый.

Аўтарскія мастацкія выказванні адлюстроўваюць як вонкавае ўспрыманне жанчыны, так і яе самаадчуванне, падахвочваючы да пошуку падабенстваў і адрозненняў мужчынскага і жаночага ўспрымання пазначанай тэмы.

Творы беларускіх і замежных мастакоў становяцца перадумовай для пераасэнсавання ролі жанчыны ў сучасным свеце сацыяльных выклікаў і ствараюць прастору, у якой становіцца магчымым імкненне да фарміравання «новай рэальнасці», прыняцця або перагляду ўласнай каштоўнасці, разумення ўнутраных жаданняў і імкненняў.

Тут агаляецца важнае і патаемнае: і дужанне з сацыяльнымі шаблонамі, і спроба стварыць свае правілы жыцця, выбудаваць уласны камфортны свет, і сыход у выдуманую рэальнасць, дзе праступаюць неўсвядомленыя запатрабаванні і страхі, здабываючы форму.

Выстава аб’ядноўвае больш за 70 твораў, аўтарамі якіх з’яўляюцца Аляксандр Кішчанка, Леанід Шчамялёў, Уладзімір Кожух, Аляксандр Дзямідаў, Уладзіслаў Швайба, Аляксандр Шапо, Таццяна Савік, Марта Шчарбіч, Аляксандра Чудакова, Надзея Лівенцава, Уладзімір Ганчарук, Дзмітрый Сурыновіч і іншыя.

Уваход на адкрыццё — вольны.

Выстава працягнецца да 21 чэрвеня.

Квіткі: 15 рублёў поўны, 10, 5 і 4 рублі льготныя.