28 чэрвеня 2017 года а 19 гадзіне ў зале BLOWUP Нацыянальнага цэнтра сучасных мастацтваў Рэпублікі Беларусь (пляцоўка – вул.Някрасава, 3) у рамках выстаўкі «Мастакі творчага аб`яднання «НЯМІГА-17» адбудзецца творчая сустрэча з легендарным беларускім мастаком Леанідам Хобатавым.
«Нароўні з разнастайнасцю новых відаў постмадэрнісцкага мастацтва навацыі ў творчасці Л. Хобатава адбываюцца ў рамках “мадэрнізацыі” маляўнічай формы, якая застаецца актуальным сродкам эстэтычнай рэфлексіі. Абнаўленне мастацкай мовы і сродкаў выразнасці канцэнтруецца ў творчасці мастака, у першую чаргу, на пластычных задачах. Ён распрацоўвае знакава-сімвалічную сістэму выраза, здзяйсняючы паварот ад апавядальнасці і ілюстрацыйнасці да колерапластычнай арганізацыі твора. Рытм, лінія, пляма, плоскасць, прастора – прыярытэт майстэрства і якасці – застаюцца асноватворнымі прынцыпамі мастака.
У цэлым, у стылявым стаўленні мастацтва Леаніда Хобатава, без сумневу, суадносіцца са скразной для ўсяго ХХ стагоддзі экспрэсіяністычнай тэндэнцыяй. Асацыяцыі з заходнееўрапейскім экспрэсіянізмам зусім відавочныя: прыярытэт выразнасці над маляўнічасцю, актыўная дэфармацыя рэальнасці, імкненне да вострай характэрнасці пластычнай інтэрпрэтацыі натуры, эмацыянальна зараджаны колер. Аднак пры поўным наборы экспрэсіяністычнай лексікі яго работам уласцівыя лірычная танальнасць светаўспрымання, сузіральнасць і вытанчанасць. Гэта экспрэсіянізм без надрыву, болю і напалу ўнутраных перажыванняў аўтара».
Кацярына Ізафатава, мастацтвазнавец,
загадчык аддзелам сучаснага беларускага мастацтва Нацыянальнага мастацкага музея Рэспублікі Беларусь
«Творчасць Леаніда знаходзіцца паміж традыцыяй і нейкімі новымі праявамі. Ва ўсякім разе, мне здаецца, што яго творчасць заўсёды вельмі добра ўплывала на гледачоў. Яно вельмі цікавіла, бо яно нечаканае, авангарднае. У 90-е яго работы выклікалі і спрэчкі, і гутаркі, і жаданне напісаць і растлумачыць, і ўвесці ў нейкія рамкі».
Наталля Шаранговіч, мастацтвазнавец,
дырэктар Нацыянальнага цэнтра сучасных мастацтваў Рэспублікі Беларусь
Уваход на творчую сустрэчу па звычайных квітках НЦСМ.
Леанід Васільевіч Хобатаў нарадзіўся 23.03.1950 ў Речыцы Гомельскай вобласці БССР.
1970 – скончыў Рэспубліканскую школу-інтэрнат па музыцы і выяўленчаму мастацтву (зараз – Гімназія-каледж мастацтваў имя І.В. Ахрэмчыка).
1975-1981 – студэнт Беларускага дзяржаўнага тэатральна-мастацкага інстытута (зараз – Беларуская дзяржаўная акадэмія мастацтваў), аддзяленне манументальнага жывапісу у прафесара Г.Х. Вашчанкі.
З 1985 – сябра Саюза мастакоў СССР.
1986-2005 – старшыня творчага аб`яднання «Няміга-17».
Займае пасаду намесніка па выставачнай дзейнасці Старшыні Беларускага саюза мастакоў.
Узнагароджаны Медалём Францыска Скарыны.
