Варкшоп аб самаарганізацыі груп и супольнасцей у сферы мастацтва
Да ўвагі мастачак/коў, куратарак/аў, крытыкаў, працаўнiц/коў культуры з Беларусі, зацiкаўленых у стварэнні самаарганізаваных калектываў/груп.
Мы рады анансаваць прыём заявак да ўдзелу ў варкшопе аб самаарганізацыі груп і супольнасцей у сферы мастацтва «СТАТУС: РАЗАМ» у рамках праекта «STATUS: роля мастачак i мастакоў у трансфармацыi грамадства», які адбудзецца 26 студзеня 2019 года на партнёрскай пляцоўцы ў Галерэі сучаснага мастацтва «Ў» з 12.00 па 17.00.
Нагадваем, што праект STATUS рэалізуюць арт-цэнтр Konstepidemin (Гётэборг, Швецыя) i галерэя КХ (Брэст, Беларусь) у партнёрстве з Галерэяй сучаснага мастацтва “Ў”.
Што будзе на варкшопе?
Адной з даследчых тэмаў у рамках праекта STATUS з’яўляецца прафесiйная мастацкая супольнасць і ўмовы яе існавання, у тым ліку самаарганiзацыя як магчымасць калектыўнага, самастойнага і незалежнага існавання прадстаўнікоў арт-супольнасці па-за межамі інстытуцыянальных, карпаратыўных ці іншых кантэкстаў, што і прапануецца абмеркаваць у рамках сустрэчы. Варкшоп будзе складацца з тэарэтычных і практычных блокаў, дзякуючы якім удзельнікі змогуць разгледзець актуальныя і важныя аспекты самаарганізацыі і крокі выбудоўвання самаарганізаваных мастацкіх праектаў / ініцыятыў.
У рамках варкшопа таксама адбудуцца перформанс мастака Дзяніса Раманоўскага «Дэмакратычны Салат» і прэзентацыі прадстаўніц і прадстаўнікоў такіх самаарганізаваных груп, як: Makeout (Віка Біран і Міла Вядрова), РАБОТАЙ БОЛЬШЕ! ОТДЫХАЙ БОЛЬШЕ! і NonExistence Centre and Ställberg Mine (Карл-Оскар Шоэгрэн, Швецыя). Выступоўцы падзеляцца практычнымі ведамі і ўласным досведам таго, як выпрацоўваюцца і асэнсоўваюцца сістэмы прыняцця рашэнняў, вопытам размеркавання зонаў адказнасці і выпрацоўкі правілаў камунікацыі ў калектывах, аб’яднаных агульнымі інтарэсамі і каштоўнасцямі.
Хто можа ўдзельнічаць?
Да ўдзелу запрашаюцца мастачкi/кi, куратаркi/ы, крытыкi, працаўнiцы/кi культуры з Беларусі, зацiкаўленыя ў стварэнні самаарганізаваных калектываў/груп. Гэта таксама могуць быць існуючыя калектывы, якім патрэбныя ўмовы для абмеркавання пытанняў самаарганізацыі і якія шукаюць прафесійнае натхненне.
Базавае валоданне ангельскай мовай вітаецца, бо частка варкшопа будзе весціся па-ангельску, але гэта не стане абмежаваннем, бо ўсе тэарэтычная блокі будуць перакладзены.
Удзел у варкшопе вольны, прадугледжаны лёгкія снэкі і кава-паўзы. Транспартныя выдаткі ўдзельнікаў, якія прыедуць у Мінск з іншых гарадоў, будуць кампенсаваныя.
Як падаць заяўку?
Калi ласка, для ўдзелу зарэгіструйцеся па спасылцы. Калi ў вас з’явiлiся пытаннi, калi ласка, пiшыце на status.project.by@gmail.com.
