Нацыянальны цэнтр сучасных мастацтваў запрашае на адкрыццё выставы «Моры рэальныя і выдуманыя. Беларускія літаратары на вакацыях» 28 снежня а 17:30.
Дата: 28.12.2023 — 18.02.2024
Час: Серада — нядзеля, 12:00-20:00 (час мясцовы)
Месца: вул. Някрасава, 3, г. Мінск
Кошт квіткоў: 7/3 (поўны/ільготны).
Тэл.: +375 17 235—03—32
Тэл.: +375 17 399—09—78
У фокусе экспазіцыі — фотаздымкі класікаў беларускай літаратуры Эдзі Агняцвет, Янкі Брыля, Уладзіміра Дубоўкі, Уладзіміра Караткевіча, Якуба Коласа, Янкі Купалы і Максіма Танка ў час летняга адпачынку (з фондаў Беларускага дзяржаўнага архіва-музея літаратуры і мастацтва).
Беларускія літаратары часта помняцца па сваіх афіцыйна-сумных партрэтах у школьных падручніках. А калі ўбачыць фота маладых Янкі Брыля ў Неапалі ці Уладзіміра Дубоўкі і Янкі Купалы на пляжы ў Ялце, ці гэта памяняе ўяўленне? Ці зменшыць дыстанцыю паміж чытачом і аўтарам? Ці дазволіць лічыць іх звычайнымі людзьмі і гэтым пацвердзіць словы Максіма Танка: «Чытаю біяграфіі нашых класікаў. Многіх я знаў асабіста. Як іх залізаныя і прычасаныя партрэты розняцца ад тых, якімі яны былі ў сапраўднасці людзьмі, у меру святымі і ў меру грэшнікамі, а не нейкімі манекенамі»?
Фотаздымкі з мора. «Мора» беларуса (мора рэальнае — з «пацалункамі салонай марской вады» (У.Караткевіч) — ці выдуманае, метафарычнае — «зялёнае мора ржаных каласоў» (Я.Колас) — гэта мара ці ўспамін пра лета, прастору, запоўненую сонцам і яркімі колерамі, прыемны адпачынак.
Атмасфера выставы ў НЦСМ дазволіць на час забыцца пра занураныя ў снег шэрыя вуліцы Мінска і патрапіць у свет колераў, летняй цеплыні і радасных эмоцый.
Мы запрашаем глядзець на архіўныя дакументы не толькі як на сведчанні эпохі, жыцця канкрэтных творцаў. Упісаныя ў экспазіцыю, яны становяцца творам фатаграфічнага, так званага «актуальнага», мастацтва і праз гэта набываюць дадатковую каштоўнасць.
Традыцыйна на выставе будуць прадстаўлены працы беларускіх мастакоў з фонду НЦСМ.
