“Sixty Interpretations of Sixty Seconds” – такі назоў мае канцэптуальная кампіляцыя, што днямі пабачыла сьвет. 60 музыкаў з розных куткоў плянэты сольна імправізуюць па 60 сэкундаў кожны, ствараючы такім чынам глябальную сымфонію.

Аўтарам ідэі стаў свабодны імправізатар з Таронта Дэвід Сайт, які ўжо даўно імкнецца наладзіць інтэрнацыянальныя сувязі з аднадумцамі. Ліст ад Дэвіда з прапановай запісаць хвілінны твор атрымаў і лідэр менскай групы “Князь Мышкін” Лявон Нарушэвіч, які займаецца інтуітыўнай імправізацыяй ужо болей за 20 год. Лявон з завальненьнем найграў трэк на электрагітары.

Навогул, у калекцыі “Sixty Interpretations of Sixty Seconds” можна пачуць самыя розныя інструмэнты: акадэмічныя (габой, клявэсін, віялянчэль), джазавыя (сакс, кантрабас), народныя (акардэон)… У якасьці інструмэнтаў задзейнічаныя самаробныя прыборы й побытавыя прадмэты. Кожны з музыкаў прадэманстраваў свой індывідуальны падыход да вырашэньня задачы. Напрыклад, Юрко Рафалюк з Украіны грае на цымбалах, а брытанец Майк Сьміт – на колавай ліры. Японец Юічы Аноўэ дэманструе свой аўтарскі інструмэнт “каісацука”, а Лінсі Полак – дуду, зробленую з гумовой пяльчаткі. Брытанец Роні Крыпнэр абраў для імправізацыі царкоўны арган, а аўстрыец Хэрыбэрт Фрыдл абмежаваўся хатнім стулам. Варта адзначыць і яшчэ аднаго ўдзельніка праекту – амэрыканца Тода Тэйлара, які паводле Кнігі рэкордаў Гінэса грае на баджа хутчэй за ўсіх.

Пры ўсёй пярэстасьці матэрыялу адчуваецца нешта тонкае, сакральнае, што зьвязвае гэтых 60 музыкаў, раскіданых па плянэце. Падрабязней пазнаёміцца з кампіляцыяй “Sixty Interpretations of Sixty Seconds” можна па наступных спасылках:

https://freejazz-stef.blogspot.com/2010/09/sixty-interpretations-of-sixty-seconds.html
https://endofworldmusic.blogspot.com/2010/09/sixty-interpretations-of-sixty-seconds.html

А што тычыцца Лявона Нарушэвіча, то пачуць ягоныя імправізацыі супольна з паэтычнымі танцамі Дзьмітрыя Строцава можна будзе 11 кастрычніка а 19-ай гадзіне ў менскім клюбе “Лісіная нара” (Каліноўскага, 32). Тэлефон арганізатараў: +375 29 6 203 201.