Лета — самы час для вандровак. Падарожнікаў, што завітаюць у самы маленькі горад Беларусі Дзісну, чакае шмат цікавага. Каб не разгубіцца ды нічога не прапусціць, сабралі для вас сем найбольш вартых увагі аб’ектаў Дзісны.
Фота: planetabelarus. by
Касцёл Беззаганнага Зачацця Панны Марыі
Мураваны барочны касцёл Беззаганнага Зачацця Найсвяцейшай Панны Марыі, які мы можам пабачыць сёння ў Дзісне, быў узведзены ў 1773 годзе на месцы свайго драўлянага папярэдніка, што быў збудаваны разам з кляштарам дзеля патрэбаў ордэна францішканаў, запрошанага сюды ў ХVI стагоддзі Стэфанам Баторыем.
Фота: vedaj. by
Касцёл Беззаганнага Зачацця Найсвяцейшай Панны Марыі, на жаль, не дзейнічае і знаходзіцца ў стане працяглай рэстаўрацыі. Будынак быў моцна пашкоджаны падчас Другой сусветнай вайны і паступова разбураўся. Рэстаўрацыйныя працы тут пачаліся адносна нядаўна і працягваюцца па сённяшні дзень. Цікавы факт, што ў 1917 годзе тут, у дзісненскім касцёле, ксёндз Адам Станкевіч адслужыў першую імшу па-беларуску.
Фота: planetabelarus. by
Царква Маці Божай Адзігітрыі
Царква Маці Божай Адзігітрыі ў Дзісне, збудаваная ў 1904 годзе ў якасці капліцы, захавалася да нашых дзён. Побач з царквой можна пабачыць таксама званіцу пачатку ХХ стагоддзя. Дадзеная царква не была зачынена за савецкім часам, і каб змясціць усіх вернікаў, яе давялося пашырыць за кошт невялікай прыбудовы з белай цэглы ў другой палове мінулага стагоддзя.
Фота: planetabelarus. by
Царква Уваскрашэння Хрыстова
Ёсць у Дзісне і «мураўёўка» — мураваная царква Уваскрашэння Хрыстова, збудаваная па тыповым праекце ў рэтраспектыўна-рускім стылі пасля Студзеньскага паўстання ў 1864 годзе. Тут сёння захоўваецца цудадзейны абраз Маці Божай «Адзігітрыі» — копія ХVIII стагоддзя больш старажытнага абраза Смаленскай іконы Божай Маці «Адзігітрыі».
Фота: planetabelarus. by
Мост праз Дзісну — самы стары ў Беларусі
Асобнай увагі заслугоўвае мост праз раку Дзісна. Ён унікальны тым, што з’яўляецца, бадай, самым старажытным з усіх захаваных мастоў у Беларусі: быў узведзены напрыканцы ХІХ стагоддзя. Гэта ўнікальны арачны мост з драўляным пакрыццём, які трымаецца на металічнай і каменнай аснове. У наш час мост з’яўляецца аўтамабільным, яго істотна адрамантавалі, паверх быў пакладзены асфальт.
Фота: @elgatomarinero7
Паромная пераправа праз Дзвіну
Яшчэ адной асаблівасцю Дзісны з’яўляецца дзейная паромная пераправа праз Дзвіну. У Беларусі засталося няшмат месцаў, дзе можна скарыстацца паромам, таму абавязкова варта завітаць у Дзісну ды не абмінуць увагай і гэтую цікавую турыстычную атракцыю. А на іншым беразе ўжо чакае Верхнядзвінскі раён.
Фота: @elgatomarinero7
Фота: @elgatomarinero7
Руіны бальніцы пачатку ХХ стагоддзя
У Дзісне захавалася вялікая колькасць будынкаў ХІХ — пачатку ХХ стагоддзя. Асноўнай перлінай сярод іх з’яўляюцца крушні лякарні, узведзенай на пачатку ХХ стагоддзя з чырвонай цэглы на беразе Заходняй Дзвіны, якія абавязкова варта пабачыць. Тут выдатнае месца для фотасесіяў, адкуль адкрываюцца маляўнічыя краявіды на наваколле.
Фота: planetabelarus. by
Фота: planetabelarus. by
Местачковая забудова канца ХІХ — пачатку ХХ стагоддзя
Побач з аўтастанцыяй знаходзіцца колішні будынак Павятовага аддзялення апякунства цвярозасці. На першым паверсе тут у 1911 годзе выступала першая беларуская прафесійная тэатральная трупа Ігната Буйніцкага. Будынак узведзены напрыканцы ХІХ стагоддзя і сёння добра адрамантаваны. Яшчэ неабходна звярнуць увагу на пажарнае дэпо, якое і сёння функцыянуе па першапачатковым прызначэнні.
Фота: planetabelarus. by
Фота: planetabelarus. by
ПЖ, budzma.org
