Найноўшыя тэхналогіі даюць магчымасць кожнаму адчуць сябе фатографам. Але зрабіцца майстрам фотаздымка ўдаецца далёка не кожнаму. Відаць, менавіта таму праца прафесійных фатографаў ацэньваецца часам не горш за працу праграмістаў.
У межах Чацвёртага фестывалю беларускамоўнай рэкламы і камунікацыі AD.NAK! сёлета стартавала намінацыя “РЭКЛАМНЫ ФОТАЗДЫМАК“, арыентаваная выключна на прафесійных фатографаў і рэальна створаныя праекты. Удзел у намінацыі могуць узяць фотаздымкі, якія ўжываліся ў распрацоўцы рэкламных матэрыялаў альбо кампаній для прасоўвання прадукту ці складання альбо падтрымкі карпаратыўнага іміджу.
Да ўдзелу ў намінацыі прымаюцца толькі прафесійныя творы, зробленыя ў перыяд з 1 студзеня 2010 года да тэрмінаў заканчэння прыёму прац 3 чэрвеня 2013 года і знайшлі рэалізацыю.
З тэхнічнымі патрабаваннямі да работ, што прымаюцца да ўдзелу ў намінацыі, можна пазнаёміцца ў раздзеле “F. РЭКЛАМНЫ ФОТАЗДЫМАК“. Журы будзе ацэньваць работы па некалькіх крытэрах, сярод якіх яснасць ідэі, адпаведнасць работы мэтам камунікацыі, узровень тэхнічнага і мастацкага выканання, наяўнасць “іскрынкі” і г.д.
Творы можна дасылаць да 3 чэрвеня праз раздзел “Падаць работу” на сайце Adnak.by альбо праз звычайную пошту на CD/DVD дысках на адрас аргкамітэта: 220030, Рэспубліка Беларусь, г. Мінск, вул. Няміга, 5, 3 паверх, частка офіснага памяшкання № 21б, з паметкай «Аргкамітэту фестывалю AD.NAK!». Пераможцы намінацыі атрымаюць каштоўныя прызы ад ZНЯТА STUDIO.
Для фатографаў-аматараў сёлета зладжаны конкурс “P. AD.NAK ZНЯТА ТАК!“. Удзельнікі конкурсу могуць праявіць сябе ў трох намінацыях: “Смачна”, “Прыгажосць” і “Родны кут”. Да ўдзелу ў намінацыі “Смачна” прымаюцца фотаздымкі розных ласункаў ды проста ежы, у намінацыі “Прыгажосць” – фэшн-здымкі, у намінацыі “Родны кут” – адметнасці вашага горада як месца прытулку сучаснага еўрапейца.
Галоўнае адрозненне НАМІНАЦЫІ ад КОНКУРСУ у тым, што у НАМІНАЦЫІ могуць узяць удзел толькі рэальныя праекты, якія былі зацверджаныя замоўцамі і рэалізаваныя. У межах КОНКУРСУ ўдзельнікам прапануецца стварыць работу згодна з умовамі, даслаць у аргкамітэт і ўдзельнічаць у праграме Фестывалю.
Да ўдзелу ў конкурсе прымаецца ад 3 да 5 фотаздымкаў у кожную з намінацыяў конкурсу. З падрабязнымі тэхнічнымі патрабаваннямі да фотаздымкаў можна азнаёміцца ў раздзеле “P. AD.NAK ZНЯТА ТАК!“.
Работы прымаюцца да 3 чэрвеня. Удзел у фестывалі БЯСПЛАТНЫ.
