Грамадская ініцыятыва «За Новыя Смалявічы» сабрала сваіх сяброў, каб зладзіць экскурсію па гістарычных месцах свайго роднага краю. Нягледзячы на дрэннае надвор’е, што было на выходных, падарожжа атрымалася яркім і лёгкім.

Сябры наведалі ваколіцы Смалявіч, а таксама вёскі Пекалін, Верхмень, Шыпяны, Алесіна.

Экскурсія пачалася з наведвання Жыдоўскай гары – месца памяці ахвярам фашызму. Тут у 1941 годзе было расстраляна каля 3000 габрэяў. У 2006 годзе англійскія мецэнаты Даяна і Марк Лазору ўсталявалі тут помнік.

Затым мы наведалі землі сям’і беларускага кампазітара Станіслава Манюшкі. Экскурсавод распавяла гісторыі аб славутых членах гэтай сям’і: дзядзьках кампазітара Дамініка і Казіміра, а таксама пра жыццё бацькі і маці Манюшка. Менавіта ў мястэчку Радкоўшчына Станіслаў напісаў свае першыя дзіцячыя творы, тут ён атрымоўваў урокі вакалу і музыкі ад маці, перачытваў бібліятэку дзядзькі. Нажаль, зараз мястэчка Радкоўшчына не захавалася, у часы вайны яно было моцна разбурана, і людзі больш туды не вярнуліся. З часоў жыцця Манюшкаў захаваліся 2 камяні, якія зрабіў бацька кампазітара: камень для таго, каб ушанаваць памяць пра справу свайго брата Дамініка, які пабудаваў тут 2 школы і лабараторыю для сялян, а таксама у памяць маці Станіслава Манюшкі, якая рана пакінула сям’ю. Гэтыя камяні зараз змешчаны ў в. Алесіна.

Наступная кропка падарожжа сталася вёска Верхмень – месца, дзе напрыканцы 19 стагоддзя працаваў Якуб Колас. Працаваў ён тут недоўга – 8 месяцаў. У гэты час пісьменнік распачаў сваю трылогію «На ростанях». Галоўны герой твора настаўнік Лабановіч працаваў у вёсцы Верхань. Зараз Верменьская школа перанесена у вёску Алесіна, і там працуе музэй Якуб Коласа. Шмат, хто з настаўнікаў, займаюцца даследваннем і параўноўваннем малюнкаў трылогіі з рэчаіснасцю нашага краю.
Напрыканцы нашага падарожжа мы наведалі былыя землі сям’і мастака Ваньковіча, а менавіта, парк у вёсцы Шыпяны і азёры ў вёсцы Алесіна. У парку захавалася брама 19 стагоддзя, а таксама мы пабачылі стары 200-гадовы дуб. Месцы былых земляў Ваньковічаў у непрыкметным стане, а маглі б стаць добрымі турыстычнымі кропкамі.

Падрабязней пра месцы, што мы наведалі, а таксама фотаздымкі падарожжа на старонцы партала г. Смалявічы

Калі хто жадае здзейсніць падобнае падарожжа па Смалявіччыне, калі ласка звяртайцеся да грамадскай ініцыятывы «За Новыя Смалявічы» праз сайт www.Smaliavichy.by ці емейл goradnasz@gmail.com

Тэгі: Смалявічы