Аб аднаўленні ўнікальнай капліцы — помніка сакральнага дойлідства ХIХ стагоддзя — распавялі аўтары групы «Планета Беларусь» у Facebook.
Так выглядае капліца пасля рэстаўрацыі
Вёска Мількавічы размешчана за 7 км ад Навагрудка ў бок Бярозаўкі. Зусім нядаўна сіламі прыхаджан і двума мясцовымі калгасамі тут аднавілі капліцу — помнік сакральнага дойлідства ХIХ ст.
Гэта адзіная драўляная капліца, якая захавалася на Навагрудчыне.
Так выглядае капліца пасля рэстаўрацыі
«Як яна выстаяла да нашых дзён і не «рассыпалася» да гэтага часу — вядома толькі ёй самой! Трэба аддаць належнае будаўнікам, якія падчас рэстаўрацыйных работ імкнуліся максімальна захаваць аўтэнтычнасць дадзенай пабудовы. Асабліва беражліва паставіліся да алтара. Удалося аднавіць і закансерваваць частку пляцоўкі, якая мацавалася без прымянення цвікоў, на спецыяльных шыпах. З вонкавага боку захавалі драўляныя сцены. А вось дах прыйшлося замяніць цалкам!», — адзначае «Планета Беларусь».
Так выглядала капліца да рэстаўрацыі
Падчас рэстаўрацыйных работ у капліцы знайшлі рэліквіі 1755 г. з надпісамі на лацініцы, барэльеф — дакладную копію выявы Маці Божай (Вастрабрамскай) 1844 г., старадаўнія падсвечнікі, ручнікі і абрусы.
Капліца ў Мількавічах стаіць на мясцовых могілках. Жыхары вёскі прыходзяць сюды памаліцца за Св. Антонія Падуанскага, за пахаваных тут людзей, а таксама за тых, хто дапамог ім аднавіць і захаваць помнік даўніны, не зрабіўшы з яго навадзел.
