Каля 40 працэнтаў случчан сказалі, што выкарыстоўваюць беларускую мову ў штодзённых размовах, амаль 54 працэнты — разумеюць мову, але не выкарыстоўваюць. Гэта вынікае з апытання, што праводзіць аддзел адукацыі Слуцкага райвыканкама, перадае Новы Час.
Вынікі апытання на 10 гадзін раніцы 19 сакавіка. Зрэшты, прагаласаваць яшчэ пакуль можна
Вынікі апытання можна пабачыць на сайце Слуцкага райвыканкама. З іх можна вынікае, што большасць бацькоў хацела б, каб іх дзеці дасканала валодалі роднай мовай. У апытанні па становішчы на 9 гадзін раніцы 19 сакавіка прынялі ўдзел 297 чалавек, якія адказалі на розныя пытанні. З тых 297 асобаў, што прагаласавалі, 177 выказаліся за тое, каб дзеці свабодна размаўлялі па-беларуску. Супраць — толькі 65 удзельнікаў.
173 чалавек хочуць, каб школьнікі вывучалі гісторыю Беларусі на роднай мове, адмоўнае стаўленне выказала меншая частка — 112 чалавек.
Да беларускамоўнага выхавання ў дзіцячых садках пазітыўна ставіцца крыху менш, чым палова апытаных.
Крыху больш за палову падтрымалі беларускамоўную адукацыю ў школе па ўсіх навучальных прадметах: за — 150 чалавек, 147 — супраць.
Па выніках апытання Слуцкае гарадское таварыства беларускай мовы напісала зварот да бацькоў, які цяпер распаўсюджваецца ў мясцовых чатах. У сваім звароце ТБМ просіць бацькоў Слуцкага раёна агучыць сваё пажаданне наконт беларускамоўнага навучанню на школьных бацькоўскіх сходах і напісаць пісьмовыя звароты на імя дырэктараў школ, аддзела адукацыі Слуцкага райвыканкама наконт забеспячэння законнага права на атрыманне адукацыі на беларускай мове.