Учора Аляксандр Лукашэнка падпісаў прыняты Палатай прадстаўнікоў і адобраны Саветам Рэспублікі Нацыянальнага сходу Кодэкс Рэспублікі Беларусь аб культуры. Яго неабходнасць тлумачыць намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Алесь Суша:

“Па-першае, больш сістэмнасці ў заканадаўстве. Нормы большасці законаў і падзаконных нарматыўна-прававых актаў, якімі кіраваліся бібліятэкі, уключаныя ў склад Кодэкса, структураваныя, сістэмна скампанаваныя. Дзесьці выключанае дубляванне, дзесьці закрытыя лакуны ў заканадаўстве.

Па-другое, зручнасць. Цяпер замест вялікай колькасці розных НПА, зацверджаных прэзідэнтам, парламентам, Саветам Міністраў, Міністэрствам культуры і інш., мы маем адзін Кодэкс, у якім па магчымасці сабрана ўсё разам.

Па-трэцяе, стабільнасць заканадаўства. Калі ў 1990—2000-я заканадаўства змянялася досыць часта, некаторыя НПА перапісваліся ледзь не штогод, а сёння мы нарэшце выпрацавалі не скажу дасканалую, але досыць якасную сістэму заканадаўчага рэгулявання сферы культуры. Усе разумеюць, што мяняць Кодэкс кожны год ужо не атрымаецца і гэты дакумент надоўга. Таму гэты фактар ​​улічваўся пры яго распрацоўцы.

Па-чацвёртае, самадастатковасць і магчымасць пахваліцца, што мы першыя. Гэта таксама важна. Распрацоўкай Кодэкса аб культуры Беларусь паказала, што не ідзе следам за кімсьці і не паўтарае ўсе законатворчыя ініцыятывы іншай краіны, а мае ўласную палітыку ў гэтым кірунку.

Гэта ўсё былі важныя, але агульныя словы. А пераходзіць да канкрэтыкі неяк складана. Вельмі ж ужо шмат у Кодэксе розных дэталек і важных рашэнняў, у тым ліку ў галіне бібліятэчнай справы: пачынаючы ад тэрмінасістэмы і заканчваючы канкрэтнымі механізмамі кіравання асобнымі напрамкамі работы”

Алесь Суша, facebook.com