Журналістка Кацярына Андрэева была асуджана на 2 гады калоніі за стрым, які яна вяла разам з калегай, аператаркай Дар’яй Чульцовай з мінскай «Плошчы Перамен» у лістападзе 2020-га пасля смерці Рамана Бандарэнкі. Кацярына знаходзіцца ў калоніі ўжо 16 месяцаў. Учора стала вядома, што ёй было прад’яўлена новае абвінавачванне — па артыкуле «Здрада дзяржаве» (ч. 1 арт. 356). Цяпер ёй пагражае да 15 гадоў зняволення. Пра гэта напісаў муж Кацярыны Андрэевай Ігар Ільяш на сваёй старонцы ў Фэйсбуку.
Фота з Фэйсбука
«Кацярыне прад’яўленае абвінавачанне па ч. 1 арт. 356 („Здрада дзяржаве“). Следства завершана, справа неўзабаве будзе перададзеная ў пракуратуру, — напісаў Ігар Ільяш. — Магчыма, ужо ў траўні адбудзецца суд. Каці пагражае ад 7 да 15 гадоў пазбаўлення волі.
Мы не ведаем, на аснове якіх падзей паўстала гэтае абвінавачанне. Справай займалася УКДБ па Гомельскай вобласці, следства праходзіла ва ўмовах поўнай сакрэтнасці, то-бок аж да ўчарашняга дня, на працягу 55 сутак пасля яе пераводу ў СІЗА, сваякі не ведалі ні статусу Каці, ні артыкула, па якім праводзяцца тыя самыя „працэсуальныя дзеянні“. Пра сутнасць абвінавачання мы нічога не ведаем дагэтуль і, напэўна, ніякай інфармацыі на гэты конт ужо не атрымаем — суд відавочна будзе закрытым.
Але не абавязкова ведаць нейкія дэталі, каб разумець усю абсурднасць падобнага абвінавачання. Каця была прысуджаная да 2 гадоў пазбаўлення волі за стрым з акцыі пратэсту, яна ўжо 16 месяцаў знаходзіцца за кратамі. І вось за пяць месяцаў да завяршэння тэрміну зняволення ёй раптам выстаўляюць новае абвінавачанне — у „здрадзе радзіме“. У ахопленай таталітарным вар’яцтвам дзяржаве такая канструкцыя апрыёры не можа мець нічога агульнага з законам і рэальнасцю. Затое відавочная аналогія са сталінскай практыкай — накручваць новы тэрмін палітвязню, калі падыходзіць да канца папярэдні. Прычым і тэрмін ёй таксама пагражае цалкам сталінскі».
