Вядомы беларускі юрыст, прысуджаны да 10 гадоў калоніі, напісаў 100 апавяданняў па матывах турэмнага вопыту. Іх сабралі ў кнігу і выдадуць у расійскім выдавецтве «Время».
Максім Знак, знаходзячыся ў зняволенні, піша вершы, песні, апавяданні, а таксама скончыў працу над фантастычнай аповесцю. Вершы і лісты аўтара публікуе яго сястра ў тэматычным тэлеграм-канале.
Кароткія апавяданні пра яго жыццё ў зняволенні аб’яднаны ў зборнік «Зэкамерон». У часопісе «Знамя» ўжо анансаваная публікацыя зборніка.
Часопіс «Знамя» раней апублікаваў падборку кароткіх апавяданняў Максіма Знака, якія атрымалі гарачы водгук чытачоў.
Максім Знак - кандыдат юрыдычных навук, аўтар шматлікіх публікацый па прававой тэматыцы, эксперт World Bank’s Doing Business.
З траўня 2020 года займаўся юрыдычным напрамкам працы штаба кандыдата ў прэзідэнты Беларусі Віктара Бабарыкі. 9 верасня 2020 года быў затрыманы, а 6 верасня 2021 года яму прысудзілі дзесяць гадоў пазбаўлення волі.
У цяперашні час выдавецтва «Время» актыўна публікуе сучасных аўтараў, уключаючы творы беларускага пісьменніка Сашы Філіпенкі.
