За перформанс лідара гурта Mister X Ігара Банцара асудзілі на паўтары гады «хіміі». Ён вызвалены з-пад варты

Суд Ленінскага раёна Гародні 19 сакавіка вынес прысуд па крымінальнай справе музыканта і шоўмена Ігара Банцара, перадае Гарадзенская Вясна. Яго вінавацяць паводле часткі першай артыкулу 339 Крымінальнага кодэксу (хуліганства).


Ігар Банцар на волі. Фота: Гарадзенская Вясна.
Ігар Банцар на волі. Фота: Гарадзенская Вясна.

Беларускай праваабарончай супольнасцю Ігар Банцар прызнаны палітычным зняволеным.

Працэс вядзе суддзя Наталля Козел. Пракурор — Віктар Нічыпарук.

Лідара гурта Mister X Ігара Банцара судзілі за вулічны перформанс, які ён здзейсніў у ноч з 4 на 5 верасня, танцуючы ў ружовых шортах перад міліцэйскай машынай, а потым скінуўшы шорты і застаўшыся ў стрынгах. Пазней яму інкрымінавалі артыкул 339 Крымінальнага кодэксу.

Пад вартай Ігар Банцар знаходзіцца з 20 кастрычніка. На самым пачатку судовага працэсу 3 сакавіка ён абвесціў сухую галадоўку.

На папярэднім пасяджэнні 18 сакавіка пракурор прапанаваў пакараць Банцара паўтара гадамі абмежавання волі з накіраваннем у папраўчую ўстанову (так званая «хімія»).

Суддзя Наталля Козел выносіць прысуд: паўтары гады абмежавання волі з накіраваннем у папраўчую ўстанову адкрытага тыпу («хімія»)

Таксама суд пастанавіў залічыць у адбыты тэрмін пяць месяцаў знаходжання пад арыштам, якія лічацца як дзень за два.

Ігар Банцар зараз на волі да моманту накіравання ў месца адбыцця пакарання.

Гарадзенская Вясна