20 верасня Беларускі Свабодны Тэатр вяртаецца на сцэну з новай пастаноўкай. «Urząd Przyjemności» — прэм’ера, якая прымушае глядзець у вочы рэчаіснасці. На прэм’еру спектакля, якая адбудзецца ў Варшаве, ужо раскуплены ўсе квіткі, але пастаноўка будзе ісці яшчэ ў Skłot Syrena цягам верасня і кастрычніка.
Фрагмент афішы да спектакля. Фота: kupbilecik.pl
Пра што гэты спектакль
Гэта гісторыя не пра Польшчу, а пра сістэму, якая забываецца, што перад ёй — чалавек. Пра людзей, што апынуліся паміж межамі, мовамі і чаканнем. Гэта спектакль, створаны з асабістага досведу актораў, якія самі праходзілі праз ужонды, анкеты, бясконцыя чэргі, абыякавыя погляды.
«Urząd Przyjemności» — гэта споведзь людзей, якія не хацелі з’язджаць, але былі вымушаныя. І нават тут павінны даказваць, што маюць права на жыццё. Гэта шчырая тэатральная работа без эфектаў, але з эфектам, які застаецца надоўга. Тут асабісты досвед становіцца тэатрам. Без фільтраў, без літасці, — пішуць аўтары спектакля ў Фэйсбуку.
Навошта ісці
- Адчуць сябе чалавекам у сістэме, якая спрабуе цябе абязлічыць.
- Падзяліць гэтую споведзь. Гэты крык. Гэты напамін, што свабоду немагчыма адмяніць рашэннем інспектара.
- Пачуць гісторыі пра ўсіх, хто сутыкнуўся з сістэмай, у якой нібыта ёсць усе правілы, але няма чалавечнасці.
«Бюракратыя — гэта таксама палітычная сцэна, а значыць — надышоў час зрабіць з яе тэатр. Свабодны Тэатр — гэта прастора, дзе асабісты досвед набывае калектыўны сэнс. Мы працягваем гаварыць там, дзе іншыя маўчаць. І робім гэта праз мастацтва», — адзначае каманда тэатра.
Дадатковая інфармацыя
Працягласць спектакля: 90 хвілін, без антракту
Мовы пастаноўкі: польская, ангельская, беларуская, руская
Субтытры: на польскай і ангельскай мовах
Узрост: 18+
Змяшчае: гучныя гукі, выбухі, дым, сцэны са стробасвятлом, а таксама згадкі пра дарослую тэматыку, уключаючы лаянку, гвалт, ужыванне зброі і сэксуальнае насілле.
Час і месца паказаў: 21 верасня, 4 кастрычніка, 5 кастрычніка, 11 кастрычніка, Skłot Syrena, (ul. Wilcza 30), Варшава.
Набыць квіткі можна тут.
