На віртуальнай выставе Нацыянальнага музея Рэспублікі Комі можна ўбачыць фотаздымкі тэкстылю, створанага беларускай Галінай Вавілінай. Яна нарадзілася на Палессі, падчас Другой сусветнай вайны аказалася ў нямецкім канцлагеры, а ў канцы 50-х пераехала ў Сыктыўкар і засталася там жыць.

Усе фота: projects.museumtur.ru/beloruss_tekstil/

У рамках юбілейных імпрэз, прысвечаных 25-годдзю грамадскай арганізацыі «Беларуская нацыянальна-культурная аўтаномія Рэспублікі Комі», а таксама з нагоды Года культурнай спадчыны ў Расіі, Нацыянальны музей Рэспублікі Комі і Гродзенскі гісторыка-археалагічны музей абмяняліся віртуальнымі выставамі.

Гродзенскі музей падзяліўся выставай «Беларускія традыцыі: Ганчарнае рамяство Панямоння».

А Нацыянальны музей Рэспублікі Комі прадставіў праект на аснове сваёй калекцыі беларускага тэкстылю. Усе прадметы, паказаныя на фота, стварыла беларуска Галіна Чачко (пасля замужжа — Вавіліна). Яна нарадзілася ў 1922 годзе ў сяле Пагост Жыткавіцкага раёна. Падчас Другой сусветнай вайны сям'ю пагналі ў Германію. Галіна Філіпаўна працавала на кухні канцлагера Хемніц. У 1945 годзе канцлагер быў вызвалены савецкімі войскамі. Пасля вайны Галіна Чачко працавала звенавой, звяно сеяла і пасынкавала тытунь. Міністэрства сельскай гаспадаркі ўзнагародзіла яе значком «выдатнік сацыялістычнай сельскай гаспадаркі». У 1958 годзе Галіна прыехала ў Сыктыўкар няньчыць пляменніка, выйшла замуж і засталася ў сталіцы Комі. 

Калекцыя дае ўяўленне пра тое, якім быў народны тэкстыль Усходняга Палесся ў пасляваеннае дзесяцігоддзе. Усе рэчы — ручнікі, пакрывала, падзоры (накідкі) для ложка — вырабленыя ў 1946-1958 гг. Іх перадала ў музей дачка Галіны Вавілінай у памяць пра сваю маці.

Галіна Вавіліна з пляменнікам. Комі АССР, Сыктыўкар, 20.01.1958