Гатуем з «Будзьма»! Новы відэапраект ад нашай кампаніі. Кожную раніцу суботы мы будзем паказваць вам хуткі відэарэцэпт смачнай беларускай стравы, якую лёгка згатаваць, а для вашых блізкіх яна стане смачным сюрпрызам выхаднога дня.
Адкуль пайшлі бліны
Гісторыя бліноў налічвае тысячы год. Яны былі першай стравай, якую людзі пачалі гатаваць пасля таго, як навучыліся рабіць муку. Яшчэ ў дахрысціянскі перыяд амаль у кожным доме гаспадыні мелі муку і ваду ды ўмелі рыхтаваць цеста. З цеста тады пяклі пышныя ляпёшкі ці блінцы.
Кожная краіна мае свае варыянты прыгатавання і ўжывання бліноў. На Захадзе — панкейкі, маленькія і пышныя аладкі, якія падаюць з салодкім соусам. Краіны Паўночнай Амерыкі пякуць бліны з кукурузнай мукі і ядуць іх з кіслымі ці вострымі запраўкамі. Азіяты робяць бліны з рысавай мукі ды заварочваюць у іх розныя начынні.
У беларускай традыцыі бліны — хіба адна з самых старажытных страваў, якую выкарыстоўвалі нават у часы язычніцтва, і не заўсёды як страву, але і як элемент культу. У хрысціянскія часы на «Дзяды» ці «Каляды» бліны былі абавязковай стравай на стале, імі сімвалічна частавалі продкаў. Бо блін — гэта збожжа, а збожжа атрымлівалі дзякуючы малітве сваім продкам — дзядам.
Для беларусаў бліны заўсёды былі традыцыйнай стравай, але есці іх было смачней з чымсьці.
Мачанка — што гэта і як гатаваць
Для бліноў шмат не трэба — нашыя продкі рабілі муку з любой збожжавай культуры. Да нас жа дайшла версія бліноў з пшанічнай мукі. Але есці бліны асобна не так смачна, таму нашыя продкі прыдумалі розныя дадаткі, кажучы сучасным слэнгам — топінгі.
Бліны елі са смажаным яйком, шкваркамі і цыбуляй, са смятанай, але найбольш смачна — з мачанкай.
Беларуская мачанка, як італьянская піца, у яе можна дадаваць усё, што вам падабаецца, або што засталося ў вашай лядоўні: сала, каўбасу, рэбры, фарш, грыбы, цыбулю, нават перцы з агарода.
А тут рэцэпт бліноў
Прадукты на 4 порцыі:
Для мачанкі:
1 вялікая цыбуліна
грыбы (любыя) — прыкладна 200 г
каўбаса ці сала — прыкладна 200-300 г
часнок — 1 зубчык
вяршкі — 1 кубак
соль, перац — па смаку
Каб прыгатаваць 4 порцыі бліноў з мачанкай, вам спатрэбіцца вялікая цыбуліна, грыбы. Яны могуць быць любыя, што прыдатныя да ежы, і ў любой колькасці. Мы выкарыстоўвалі шампіньёны, але ніхто не забараняе вам дадаць баравікоў ці падбярозавікаў. Мясны складнік можа быць з вясковай каўбасы і сала, але ніхто не пакрыўдзіцца, калі возьмеце смачную каўбаску і кавалачак вэнджанага бачка з крамы і акуратна іх нарэжаце. Колькі хочаце — столькі і кладзіце кожнага з інгрэдыентаў. Гэта ўсё па вашаму смаку і па магчымасці.
Затым трэба ўсё абсмажыць, дадаўшы дробна парэзаны часнок. Як усё прасмажылася — ідзем да соуса. Бярэм кубак вяршкоў, дадаем туды соль і перац па смаку. Перамешваем з вяршкамі і выліваем на патэльню. Мяшаем некалькі хвілінак, пакуль соус не стане густым.
Паралельна гатуем бліны. Для цеста нам спатрэбіцца 300 мл малака і тры лыжкі мукі (гэта на 4 добрыя блінчыкі), дадаем адно яйко, мяшаем цеста так доўга, пакуль яно не пачне нагадваць цягуцы сіроп, звычайна хапае трох хвілін. Правяраем, каб не было камякоў.
Прамазваем патэльню алеем і наліваем блінчык, калі ён прыпёкся, трэба перавярнуць на іншы бок. Гатовы блінчык кладзем на талерку і паліваем смачнай гарачай мачанкай.
Рэкамендуем есці блін з мачанкай упрыкуску з салёным агурком.
