Прапагандыстка Вольга Бондарава назвала франтавіка і народнага пісьменніка Беларусі Васіля Быкава нацыстам і патрабуе прыбраць яго кнігі са школьнай праграмы, піша Еўрарадыё. Паводле яе слоў, Быкаў «стаяў ля вытокаў стварэння нацысцкай партыі БНФ, адкуль выйшаў прафесар # начхаць [Ігар Марзалюк-рэд], і асабіста звязаны з нацыстам С.Шушкевічам».
Кнігі Васіля Быкава. Фота: ncbook.ru
Бондарава называе Васіля Быкава замежным агентам, які «паслядоўна і свядома ... распальваў міжнацыянальную варожасць, наладжваючы беларусаў супраць рускіх». І гэтую «празаходнюю дзейнасць», па версіі даносчыцы, «шчодра аплачваў захад праз сетку ручных НКА тыпу ПЭН-цэнтра і іншых швабодак [мабыць, маецца на ўвазе» Радыё Свабода" — рэд]«. І далей яна задаецца пытаннем: «дакуль нашым дзецям будуць уцюхіваць пра хероя вайны Быкава, замоўчваючы яго нацысцкую сутнасць?!» Яна лічыць, што Быкава трэба «выкрасліць са школьнай праграмы».
Нагадаем, Васіль Быкаў — адзін з найбуйнейшых прадстаўнікоў «лейтэнанцкай прозы», франтавік. Удзельнічаў у баях за вызваленне гарадоў Крывы Рог, Александрыя, Знаменка. Падчас Кіраваградскай аперацыі быў паранены і памылкова запісаны як загінулы. Падзеі пасля ранення пазней ляглі ў аснову аповесці «Мёртвым не баліць». Ён удзельнічаў у Яска-Кішынёўскай аперацыі па вызваленні Малдовы. З дзеючай арміяй прайшоў па Балгарыі, Венгрыі, Югаславіі, Аўстрыі. Быкаў — лейтэнант, быў камандзірам узвода спачатку палкавой, затым армейскай артылерыі. Пасля вайны стаў лаўрэатам шматлікіх прэмій і Народным пісьменнікам Беларусі. Сёлета адзначаецца 100 гадоў з дня яго нараджэння.
Бандарова большую частку свайго свядомага жыцця наогул нідзе не працавала.
