Кожны год 23 студзеня ва ўсім свеце адзначаецца Дзень почырку ці Дзень ручнога пісьма, які мае на мэце нагадаць аб непаўторнасці почырку кожнага чалавека і унікальнасці ручнога пісьма. Напярэдадні гэтага дня, у суботу, 22 студзеня, «Белпошта» ладзіць акцыю «Дзень ручнога пісьма».
У гэты дзень у выдзеленых аддзяленнях паштовай сувязі можна набыць простыя паштовыя карткі, падпісаць іх ад рукі і бясплатна адправіць у любую кропку Беларусі.
«Гэтае свята заклікана нагадаць усім нам, што пры сучасных тэхналогіях рукапіснае пісьмо не губляе сваёй значнасці і актуальнасці. Паштоўкі, напісаныя вамі, будуць доўгі час радаваць вашых адрасатаў і нагадваць пра вас», — адзначаецца на сайце «Белпошты».
Скарыстайцеся гэтай магчымасцю не толькі для таго, каб парадаваць сваіх блізкіх, але і каб падтрымаць палітвязняў. У Беларусі ўжо 993 чалавекі прызнаныя палітычнымі вязнямі.
Поўны спіс месцаў правядзення акцыі можна спампаваць па спасылцы.
Звярніце ўвагу, што ў некаторых аддзяленнях пошты акцыя будзе праходзіць не цэлы дзень, а толькі некалькі гадзін.
