Мала хто з беларусаў бываў у Амерыцы, а з інвалідаў там гасцявалі хіба што адзінкі. А тым часам Аляксандр Аўдзевіч збіраецца выправіцца туды з намётам, кілімам і на ручным ровары.
Аляксандр некалькі гадоў кіруе арганізацыяй інвалідаў-вазочнікаў у Лідзе, а ў сваім відэаблогу InvaLife выкладае ролікі аб тэхніках рэабілітацыі і сваім паўсядзённым жыцці.
Ён будзе вандраваць па Злучаных Штатах, дзяліцца краявідамі ў інстаграме, апісваць наваколле і падзеі ў ФБ і выкладаць відэаролікі на Ют’юбе. Што блогі будуць папулярнымі, Аляксандр перакананы: “Звычайныя людзі едуць у вандроўкі, посцяць пра гэта, і іншым хочацца за імі сачыць. А я зраблю ўнікальную для беларусаў вандроўку, буду як той марсіянін, толькі з Беларусі. Вядома, гэта будзе прыцягваць шмат увагі”.
Не абыдзецца і без імпульсу для іншых. Аляксандр збіраецца зрабіць цэлае шоў са свайго падарожжа, якое не толькі праславіць Беларусь як краіну, але і дасць матывацыю жыць і чымсьці займацца людзям, якія знаходзяцца ў падобным становішчы. Пасля вяртання з Амерыкі Саша плануе адкрыць у Лідзе залу актыўнай рэабілітацыі для людзей з абмежаванымі здольнасцямі, каб дапамагаць іншым вазочнікам.
Гэта не першае падарожжа лідчаніна. У жніўні 2015 года Аляксандр Аўдзевіч праехаў на ручным ровары ад Ліды да Балтыйскага мора, пра што быў зняты захапляльны фільм «200 000 абаротаў». Зараз вандроўнік збіраецца з 1 ліпеня праехаць праз Мінск, Вільню, Талін і Ліду, а пасля пабачыць Скандынавію. У ЗША адправіцца, як толькі будзе вырашанае пытанне з візай. Ён праедзе на хэндбайку ад Нью-Ёрка да Сан-Францыска. Ровар, дарэчы, стаў самай дарагой часткай рыштунку, на які Аляксандр збіраў грошы праз краўдкампанію. З заяўленай сумы за першы ж дзень атрымалася сабраць 400 тысяч.
“Ровар прыйшоў на замову з Аўстрыі. Там інвалід вырабляе такія рэчы, як спецыяльныя вазочкі, ровары і моналыжы, каб людзі маглі спускацца з гор па снезе”, — адзначыў вандроўнік.
Што-нішто выпала рабіць самастойна. Так, Аляксандр сшыў торбы для рэчаў і прыдумаў мацаванне, бо рэчы для звычайнага ровара яму не пасуюць. “У хуткім часе выкладу ролік, дзе распавяду, як шыў торбу. Увогуле я не тое каб сур’ёзны турыст, так што толькі тэарэтычна ўяўляю, што мне патрэбна ў падарожжы”, — падзяліўся Аўдзевіч.
Дарэчы, Аляксандр паедзе ў вандроўку адзін, без дастатковай колькасці грошай, а толькі з мінімальным рыштункам і спадевам на новыя знаёмствы. Ягоная мара здзейсніцца дзякуючы 170 фундатарам праекта, што дапамаглі сабраць неабходныя 103 850 000 рублёў.
Марыя Грыц
