Выйшаў з друку зборнік вершаў культуролага, удавы Юрыя Зісера Юліі Чарняўскай пад назвай «Мир о тебе». Ідэя выдаць вершы Юліі Чарняўскай належыць паэту Дзмітрыю Строцаву, а само выданне сталася магчымым, у тым ліку дзякуючы таму, што, у адрозннне ад прозы, вершы Юлія Чарняўская запісвала ў сшытках ад рукі, і такім чынам яны захаваліся. Пра гэта напісала Юлія Чарняўская на сваёй старонцы ў Фэйсбуку.

«Старамоднасць бывае выратавальнай», — адзначыла Юлія Чарняўская.

Вокладку да кнігі падрыхтавала мастачка Ксіша Ангелава. На малюнку выяўлены Юлія ды Юрый, якія па-шагалаўску плывуць «Над горадам».

«Паўгода таму, у цяжкі смутны час, спатыкаючыся аб саму сябе і зрэдку аб сабаку і не вельмі верачы ў тое, што недзе існуе знешні свет, я паставілася да прапановы скласці ўласны зборнік толькі як да праявы сяброўскага ўдзелу. З разраду "мы яшчэ ўбачым неба ў дыяментах"... Неба наогул не было відаць, так, боўталася ў акне штосьці медузападобнае. Але сам намер Дзмітрыя Строцава выдаць мой зборнік крануў неверагодна!

Ды і потым, гэта была магчымасць заняцца чымсьці прадуктыўным, а не аднабаковымі размовамі з прывіднымі суразмоўцамі. Хто быў у ізаляцыі, той ці іншай, мяне зразумее», — напісала Юлія Чарняўская ў сваім фэйсбуку.

«Гісторыя гэтай кнігі — асаблівыя беларускія прыгоды, і як выдатна, што ў іх шчаслівы вынік. З якім трапятаннем рыхтавалі кнігу ўсе яе ўдзельнікі, — пракаментаваў выданне кнігі паэт Дзмітрый Строцаў. — Вядома, усіх жадаючых кніга знойдзе; трэба крыху пачакаць».

Сама Юлія зазначае, што пакуль дакладна не ведае, як будзе распаўсюджвацца гэты зборнік сярод чытачоў.