8 студзеня 1894 г. нарадіўся Святы пакутнік Максімільян Кольбэ, манах-францысканец, святар, які добраахвотна прыняў смерць у канцлагеры Асвенцым дзеля незнаёмага яму чалавека.

Будучы Святы нарадзіўся ў польскім горадзе Здунска-Воля, што недалёка ад Лодзі. Пры нараджэнні яму далі імя Раймунд. У 13 год Раймунд і яго старэйшы брат Францішак збеглі з дому, каб уступіць у каталіцкі ордэн францішканцаў. Прайшоўшы складаны шлях, хлопцы дабраліся да Львова, дзе паступілі ў перадсемінарыю. У 1914 годзе Раймунд дае святыя зарокі і прымае манаскае імя Максімільян. У 1918 годзе стаў святаром, меў дзве доктарскія ступені: філасофіі і тэалогіі. За сваё жыццё і дзейнасць заснаваў тры каталіцкія выданні.

У 1922 годзе прыехаў у Гродна, служыў у Гродзенскім кляштары францысканцаў да 1927 года. Ненадоўга вярнуўся на Радзіму, а потым паехаў місіянерам у Кітай і Японію. У 1936 годзе Максімільян вяртаецца ў Польшчу ў мястэчка Непакалянув у манастыр. Пасля таго, як нацысцкая Германія напала на Польшчу ў верасні 1939 года, частка манахаў збегла. Кольбэ і яшчэ некалькі манахаў вырашылі застацца. Непакалянув, дзе служыў Кольбэ, стаў прытулкам для тысяч уцекачоў, у тым ліку для 2000 габрэяў.

Праз некаторы час пра гэта дазналіся ў гестапа, і 17 лютага 1941 года Максіміліян Кольбэ быў арыштаваны і зняволены ў Асвенцыме. Там эсэсаўцы яго часта збівалі за тое, што хаваў габрэяў і нават у лагеры працягваў пастырскую дзейнасць: хрысціў і спавядаў вязняў, што было забаронена.

У ліпені таго ж года з блока, дзе ўтрымліваўся Кольбэ, знік адзін вязень, ён спрабаваў збегчы, але загінуў. Каб застрашыць астатніх вязняў, намеснік каменданта лагера выбраў 10 чалавек, якім было наканавана памерці галоднай смерцю. Адзін з вязняў пачаў плакаць і казаць: «Няўжо я больш не ўбачу жонку і дзяцей?». Тады Кольбэ прапанаваў аддаць сваё жыццё замест жыцця гэтага мужчыны, і яго ахвяра была прынята.

Седзячы ў камеры і паміраючы ад голаду і абязводжвання, Кольбэ працягваў падтрымліваць таварышаў па няшчасці. Яны праводзілі час у песнях і малітвах. Праз два тыдні ён і трое іншых смяротнікаў былі яшчэ жывыя. 14 жніўня 1941 года старэйшы па шпіталі Ганс Бок атрымаў загад неадкладна пакончыць з вязнямі. Кольбэ і яго траім таварышам была зроблена ін'екцыя фенолу, пасля чаго яны памерлі. Цела манаха было крыміравана, а прах развеялі па ветры.

Максімільян Кольбэ кананізаваны 10 кастрычніка 1982 года. Дзень памяці — 14 жніўня.

АМ,budzma.org