23 чэрвеня 2016 года ў музеі Петруся Броўкі паэтэса Вера Буланда правяла сустрэчу з цікавымі людзьмі, медыкамі-паэтамі, адлюстраванымі ў кнізе журналіста Элы Дзвінскай “Дабру вечна перамагаць”. Асобная ўвага была сканцэнтравана на асобе Фелікса Баторына і яго кнізе “На вуліцы Максіма Багдановіча”, прадмову да якой напісаў наш цудоўны паэт Леанід Дранько-Майсюк.

Спадарыня Вера і падрыхтаваныя чытальнікі вершаў пазнаёмілі гасцей з творчасцю Фелікса Баторына, доктара і паэта.

Сяджу над санскрыпцкаю “Ведаю”,

Галаву кулакамі падпёр,

Ці баюся я смерці – не ведаю,

Бо ні разу яшчэ не памёр.

З пачуццём гумару і жыццярадасным настроем напісаныя многія вершы паэта-ўрача. Шмат у творах паэта філасофскіх разважанняў, не прамінуў доктар і інтымнай лірыкі.

…Вось і мне прыснілася пад ранне

Маладосць, далёкая, як лета,

Першае салодкае спатканне

Пасярод квітнеючага свету.

Я прачнуўся дужы і крамяны,

Цела прагне радаснага руху.

А на шыбе стыне ліст каляны,

А за шыбай кружыць завіруха.

Нямала вершаў, балад Ф. Баторын прысвяціў бальніцы, урачам. Але працуючы ўрачом, не можа не пісаць:

Надумаўся я зноў без ліры жыць,

Пегаса адпускаю на папас.

Ды кінутая ліра ўсё звініць,

Не скача прэч распрэжаны Пегас.

Без паэзіі не можа жыць доктар Бараўлянскай абласной бальніцы Вера Міхно. У мінулым годзе яна выдала свой другі зборнік “Свет сутны мой”. Перад тым, як даць ёй слова, Вера Буланда прачытала некалькі вершаў паэтэсы,

Аўтары кніг, чытальнікі вершаў ад кампаніі “Будзьма беларусамі” атрымалі ў падарунак паштоўкі і “закладкі” з выявамі беларускіх паэтаў і пісьменнікаў.