21-25 траўня адбылася азнаямляльная паездка ў Малдову прадстаўнікоў грамадзянскай супольнасці Беларусі, рэгіянальных дзяржаўных органаў і журналістаў.
Праграму арганізавала грамадская культурніцкая кампанія” Будзьма беларусамі!” сумесна з “Цэнтрам даследавання грамадскага кіравання” “SYMPA” (“Школа маладых менеджэраў публічнага адміністравання“) і малдаўскімі экспертамі з мэтай вывучэння досведу Малдовы ў сферы міжсектарнага ўзаемадзеяння ў распрацоўцы і рэалізацыі праграм і стратэгій развіцця на нацыянальным, рэгіянальным і мясцовым узроўнях.
Удзельнікі паездкі былі адабраныя з 140 заявак, атрыманых паводле вынікаў адкрытага конкурсу, на падставе рэлевантнасці досведу, зацікаўленасці і магчымасці прымяніць новыя веды.
Наста Палажанка, рэгіянальны каардынатар кампаніі “Будзьма беларусамі!”
Малдаўскі досвед інклюзіўнага развіцця цікавы для практычнага вывучэння. У Малдове грамадзянская супольнасць выконвае важную ролю ў актывізацыі шырокай грамадска-палітычнай дыскусіі, а таксама ў маніторынгу рэформаў; малдаўскі ўрад і парламент цесна супрацоўнічаюць з грамадзянскай супольнасцю, маецца шэраг нацыянальных стратэгій развіцця грамадзянскай супольнасці, апошняя з якіх была прынятая парламентам у сакавіку 2018 года.
Беларуская дэлегацыя сустрэлася з віцэ-спікерам Парламента Малдовы Уладзіміра Віцюком і старшынёй парламенцкай камісіі па прававых пытанняй Раісай Апольскі, намеснікам сакратара дзяржаўна канцылярыі Адрыянам Ермуракі, начальнікам Упраўлення палітыкі рэгіянальнага развіцця Міністэрства сельскай гаспадаркі, рэгіянальнага развіцця і навакольнае асяроддзя Ігарам Малаем, дырэктарам Нацыянальнага цэнтра па барацьбе з карупцыяй Богданам Зумбряну, дырэктарам Цэнтра электроннага ўрада Яўгенам Урсу, генеральным сакратаром офіса амбудсменаў Вольгай Вакарчук і з амбудсменам па правах дзяцей Маяй Банарэску, дырэктарам Агенцтва рэгіянальнага развіцця “Поўдзень” Марыяй Куляшоў, а таксама з прадстаўнікамі мэрыі Кішынёва, Нацыянальнага органа па непадкупнасці, Нацыянальнага савета па ўдзеле, Нацыянальнага савета грамадзянскай супольнасці, Нацыянальнага савета па недыскрымінацыі, сеткай журналісцкіх расследаванняў RISE Moldova, грамадзянскімі актывістамі і экспертамі ў галіне інклюзіўнага развіцця і грамадзянскага суда, каардынатарамі грамадска значных праекта ў Кішынёве, Чымішліі, Кэўані.
– Вельмі запомнілася, напрыклад, сустрэча з амбудсмэнам па правах дзяцей, бо такога інстытута ў Беларусі папросту не існуе. Надзвычай цікава было паслухаць пра рэальныя спосабы вырашэння праблем і спрэчных пытанняў у гэтай сферы, – адзначыў адзін з удзельнікаў паездкі.
Напрыканцы афіцыйнай і адначасова цёплай сустрэчы ў парламенце ўдзельнікі абмеркавалі першыя ўражанні і папярэднія высновы і адзначылі, што дзяржаўныя і недзяржаўныя дзеячы ў Малдове адкрыта кажуць пра свае дасягненні і з энтузіязмам пра праблемы, якія яшчэ трэба будзе вырашыць разам ўраду, бізнэсу і грамадскай супольнасці. Акадэмічны дырэктар SYMPA Дзмітрый Маркушэўскі паведаміў віцэ-спікеру Ўладзіміру Віцюку, што прыклады плённага міжсектарнага супрацоўніцтва і адкрытасць, якую беларуская дэлегацыя ўбачыла ў дзяржаўных і недзяржаўных арганізацыях, дэманструюць сур’ёзны патэнцыял развіцця Малдовы і могуць натхніць іншыя краіны рэгіёну.
