Сёння дзень нараджэння ў журналіста, «нашаніўца» і дзіцячага паэта Андрэя Скурко, які зараз знаходзіцца за кратамі, і над ім ідзе суд. Budzma.org у гэты дзень распавядае кароткую біяграфію Андрэя і прапануе чытачам павіншаваць палітвязня праз лісты.
Андрэй Скурко ў судзе. Фота: «Спутнік»
Ад аўтара да галоўнага рэдактара
Андрэй Скурко нарадзіўся ў мястэчку Крывічы Мядзельскага раёна ў 1978 годзе 12 сакавіка. Пасля школы атрымліваў адукацыю ў БДУ па спецыяльнасці «Беларуская філалогія» на філагагічным факультэце. Журналісцкая кар’ера як «нашаніўца» пачалася яшчэ ў 1998 годзе, праз два гады Андрэй займае пасаду намесніка галоўнага рэдактара. З 1 снежня 2006 года Скурко стаў галоўным рэдактарам штотыднёвіка «Наша Ніва» і займаў гэтую пасаду да 2017 года, у хуткім часе выданне цалкам перайшло ў інтэрнэт.
Маркетолаг, рэкламшчык і сцэнарыст дзіцячага выдання
Андрэй заняў пасаду кіраўніка аддзела маркетынга і рэкламы выдання. Таксама распачаў працу сцэнарыста дзіцячага выдання «Асцярожна: дзеці!», пісаў аўтарскія артыкулы для часопіса «Наша гісторыя».
У 2017 годзе ў Андрэя з’явіліся сур’ёзныя праблемы са здароўем — дыябет І тыпу, журналіст стаў інсуліназалежны і яму трэба некалькі разоў штодня рабіць адмысловыя ін’екцыі.
Андрэй мае жонку Паліну і маленькага сына Тамаша.
Затрымалі нібы за пратэсты, судзяць нібы за нясплату камуналкі
Андрэй Скурко, Фота «Арт-сядзіба»
8 ліпеня 2021 года Андрэя Скурко затрымалі разам з яго калегамі па выданню і змясцілі пад варту. Спачатку ён быў у статусе падазраванага па справе аб групавых дзеяннях, якія парушаюць грамадскі парадак, згодна арт. 342 КК РБ, але 28 ліпеня 2021 года яму прад’явілі абвінавачванне па па ч. 2 арт. 216 КК, згодна якому, Скурко і яго калегі нібы нанеслі шкоду маёмасці без прыкметаў раскрадання. Журналістаў вінавацяць у тым, што аплата за камунальныя паслугі памяшкання, дзе яны працавалі, была паводле тарыфаў для фізасобаў, а трэба было плаціць паводле тарыфаў для юрасобаў. Сгодна следству, «нашаніўцы» вінныя прадпрыемству «Мінэнэрга» больш за 10 тысяч рублёў. Гэтая сума была кампенсаваная ў поўным аб’ёмы, прадпрыемства да журналістаў прэтэнзій не мае, але крымінальная справа не была зачынена. 28 лютага ў судзе Заводскага раёна Мінска пачаўся працэс над палітзняволенымі журналістамі Андрэем Скурко і Ягорам Марціновічам. Судовы працэс ідзе дасюль.
За кратамі стаў дзіцячым паэтам
Знаходзячыся ў няволі, Андрэй пачаў пісаць вершы для свайго сына Тамаша і дасылаць іх у лістах. Зараз рыхтуецца аўдыёкніга дзіцячых вершаў Андрэя Скурко, якую агучваюць купалаўцы. На YouTube-канале «BAYBUS» выйшла больш за 20 мультвершаў Андрэя.
Вось як адгукнуўся пра паэтычны талент Андрэя Скурко паэт Усевалад Сцебурака: «Які месяц я хаджу пад уражаннем адкрыцця — Андрэй Скурко — класны дзіцячы паэт! Як шляхетна, мякка і па-добраму ў яго выходзіць — цуд!»
«Cпадзяюся дачакаць як ў новай Беларусі запрашу Андрэя Скурко ў прафесійную творчую арганізацыю пісьменнікаў і, на правах земляка, нясціпла напішу яму першую рэкамендацыю», — напісаў Усевалад Сцебурака.
Павіншаваць з днём нараджэння і падтрымаць Андрэя Скурко можна лістом па адрасе СІЗА-1, Мінск вул. Валадарскага 2, 220030, Скурко Андрэю Генадзевічу.
Дзіцячыя вершы Андрэя Скурко
Дзесяць катоў
Кот адзін і кот другі
Елі з макам пірагі.
Трэці і чацвёрты кот
Маслам мажуць бутэрброд.
Пяты кот і шосты зранку
Елі смачную аўсянку.
Сёмы кот і восьмы кот
П’юць са сподкаў малако.
Кот дзявяты і дзясяты
Налілі сабе гарбаты!
Каб спяваць, гуляць і бегаць —
Трэба ўсім як след паснедаць!
Вожык і дзікаабраз
Пазнаёміліся раз
вожык і дзікаабраз.
Селі разам адпачыць —
і іголкі палічыць.
На баку — сто дваццаць восем
і ніводнае на носе,
дваццаць пяць яшчэ — за вухам
(на адну з іх села муха).
На спіне — сто дзве іголкі —
а ўсіх разам будзе колькі?..
На сямнаццатым дзясятку
пачалі лічыць спачатку.
Раз — іголка, два — калючка, —
прыдаліся б ліст і ручка!
Як сем соцень налічылі,
ў небе зоры ўжо свяцілі...
Плюсавалі, памнажалі,
вочкі церлі, пазяхалі...
Засаплі спіной да спінкі
пад калючаю ялінкай.
