Фастфуд стаў неад’емнай часткай паўсядзённага жыцця, а для большасці дзяцей гэта яшчэ і добрая забава — наведаць рэстаран хуткага харчавання і атрымаць у дадатак да абеду цацку. Гэтым разам мы вырашылі пафантазіраваць на тэму, як мог бы выглядаць бургер па-беларуску.

У нацыянальнай беларускай кухні гамбургераў не было

Слова «гамбургер» — вытворнае ад назвы аднаго з найбуйнейшых нямецкіх гарадоў — Гамбурга. Існуе тэорыя, што першы гамбургер уяўляў сабой смажаны кавалак мяса ў двух кавалках хлеба. Страву прыдумалі як ежу для кірмаша, яе можна было есці на хаду.

У ЗША, адкуль гамбургеры сталі вядомыя на ўвесь свет, страва патрапіла дзякуючы нямецкім мігрантам у першай палове ХІХ стагоддзя. Пра гэта ўзгадваецца ў часопісе «Вячэрні Бостан» 1884 года выдання. Першы раз у рэстаранным меню Нью-Ёрка такую страву падалі ў 1834 годзе. 

Яшчэ адным патэнцыйным стваральнікам гамбургера лічыцца нямецкі кухар Ота Куасв. У 1891 годзе ён стварыў вельмі папулярную ў маракоў страву — смажаны кавалак мяса падаваўся паміж двума кавалкамі хлеба, разам са смажаным яйкам, і быў названы нямецкім біфштэксам. Яго ідэю рэцэпту мы ўзялі за аснову нашай стравы, замяніўшы хлеб на бульбяныя дзеруны. 

У Беларусь жа гамбургеры прыйшлі ў пачатку 1990-х гадоў, калі пачалі з’яўляцца першыя рэстараны хуткага харчавання.

Як зрабіць дзярун-бургер?

Для аднаго дзярун-бургера спатрэбяцца:

Бульба — 200 грамаў
Фарш — 200 грамаў
Агурок — 20 грамаў
Алей — 50 грамаў
Мука — сталовая лыжка
Адно курынае яйка
Соль і перац па смаку

Галоўны інгрэдыент — гэта бульба. Бульбу трэба натаркаваць: невялікую частку — на дробнай тарцы, аснову — на буйной, потым дадаць крыху мукі і перамяшаць масу. Такім чынам робіцца, каб дзярун мог трымаць форму і быў хрумсткім. У масу можна дадаць крыху перцу і солі, але гэта ўжо справа смаку.

На разагрэтую патэльню з алеем выкладваем бульбяную масу, стараемся выкласці масу бліжэй да круглай формы, калі знізу дзеруны стануць залацістага колеру, іх трэба перавярнуць, падсмажыць да такога ж колеру з іншага боку і зняць, яны стануць асновай для нашай стравы. Каб атрымалася добрая катлета, мясны фарш трэба заправіць соллю і перцам, можна дадаць каляндру, фарш добра перамяшаць. Перад тым, як фармаваць будучую катлету, фарш трэба адбіць, кідаючы кавалак фаршу з рукі ў руку. Такім чынам мы выганім лішняе паветра з фаршу і катлета добра будзе трымаць форму. Яе таксама стараемся выкласці на патэльню ў форме круга. Смажым з двух бакоў да залацістай скарыначкі. 

Пакуль катлета смажыцца, выкладзем салёны агурок на ніжні дзярун: салёны агурок вельмі добра пасуе да мяса і бульбы, робіць смак стравы больш адметным. Выкласці смажаную катлету на слой агурка, затым накрыць яе яшчэ адным дзеруном. Наверх — смажанае яйка, жаўток павінен быць вадкім, такім чынам ён паслужыць своеасаблівым соўсам для стравы. 

Смачна есці!

P. S. Вы можаце гатаваць адначасова ўсе інгрэдыенты дзярун-бургера на адной або дзвюх патэльнях. Тады падаць страву можна будзе вельмі гарачай.