3 красавіка, 15-00. Галерэя «Ў» (пр. Незалежнасці, 32-а).
Інтэрнэт-партал «Новая Эўропа» запрашае на прэзентацыю праекта «Еўрапейскае кафэ: адкрытыя лекцыі пра сучаснае мастацтва».

Месцам сустрэч нашага “кафэ” стануць розныя пляцоўкі горада Менска  – галерэі, вольныя арт-пляцоўкі, кафэ і клубы. Запрошанымі экспертамі выступяць беларускі фатограф Андрэй Лянкевіч, філосафы Альміра Усманава і Вольга Шпарага, куратар Цэнтра сучаснага мастацтва ў Вільнюсе Юлія Фаміна, маскоўскі тэатральны крытык Павел Руднеў і іншыя.

“Еўрапейскае кафэ: адкрытыя лекцыі пра сучаснае мастацтва” –  гэта

• ўнікальная магчымасць ва ўтульнай нефармальнай атмасферы ў фармаце “адкрытай лекцыі” паслухаць вядучых беларускіх і замежных экпертаў у вобласці сучаснага мастацтва;
• на візуальным матэрыяле (слайдах, відэа) пазнаёміцца з гісторыяй сучаснага мастацтва, зразумець, чаму яно перастала ствараць “шэдэўры” і чаму сучасныя мастакі сталі бачыць свет такім своеасаблівым спосабам;
• задаць пытанні, абмяняцца меркаваннямі, стаць удзельнікамі дыскусій. У канцы кожнай лекцыі адбудзецца абмеркаванне тэмы і пытанняў лекцыі з гледачамі.

3 красавіка ў 18-00 у кафэ LOFT адбудзецца першая ўступная лекцыя праекта:

“Што такое сучаснае мастацтва? Запрашаем да размовы”, эксперт – Ала Вайсбанд, мастацтвазнаўца, філосаф, кіраўнік праекта “На шляху да сучаснага музея” (Нямеччына, Дортмунд).

У рамках прэзентацыі праекта “Еўрапейскае кафэ: адкрытыя лекцыі пра сучаснае мастацтва” таксама адбудзецца абмеркаванне праблемы адсутнасці ведаў і досведу ў асяроддзі журналістаў беларускіх СМІ, якія пішуць пра падзеі беларускага культурніцкага жыцця.

У сакавіку ў рамках праекта “Радыюс нуля. Анталогія арт-нулявых” адбылася выстава, якая выклікала шмат пытанняў і дыскусій, а таксама неадназначных інтэрпрэтацый у беларускіх СМІ.

Чаму ў Беларусі дагэтуль сучаснае мастацтва выклікае больш пытанняў, чым дае адказаў нават у асяроддзі тых, хто дае яму экпертную ацэнку?

Запрашаем да дыскусіі журналістаў,  а таксама ўсіх жадаючых далучыцца да размовы.