Хочацца свята? Часам варта проста выйсці з дому! 22 ліпеня ў двары на рагу праспекта Машэрава і бульвара Т. Шаўчэнкі разгарнецца фестываль “Арэлі”. Гэта новы фармат суседскіх вечарынаў, дзе госці і арганізатары – самі жыхары. Імпрэзу ладзіць Агенцтва рэгіянальнага развіцця “Дзедзіч” разам з Адміністрацыяй Ленінскага раёна.
Праект “Арэлі” мае мэтай з’яднаць жыхароў дома ў ініцыятыўную супольнасць. Бо хто як не яны найлепш ведаюць усе патрэбы і праблемы ўласнага двара. А вырашыць іх дапамогуць гаспадарчыя службы, мясцовыя ўлады і НДА. Аб’яднаўшыся разам, суседзі змогуць палепшыць прастору, дзе яны жывуць.
На фестывалі вас чакаюць адукацыйная і забаўляльная праграмы. У двары з’явіцца стол з хатнімі прысмакамі, прыносьце вашае фірмовае печыва і кампот! З суседзямі прасцей завязаць размову, папрасіўшы рэцэпцік. А калі хтосьці хоча падсілкавацца сур’ёзней, рэстаран KFC дорыць зніжку 10% на любую замову. У глінянай майстэрні кожны зможа зляпіць свістульку. На фестывалі, дзякуючы Леанідзе Васільковіч, можна будзе пабачыць як ствараецца стрыт-арт на плоце, які дапамог падрыхтаваць ДУА “Яслі-сад №25”. Таксама ў праграме – фрымаркет, дзе можна бясплатна памяняць або аддаць рэчы ў добрым стане, выстава сучаснай беларускай літаратуры ад бібліятэкі імя А.С. Пушкіна і буккросінг. Таксама рыхтуецца выстава дзіцячых малюнкаў. Прызы для ўдзельнікаў выставы падрыхтаваў ААТ “Брестское мороженое”. А для ўсіх жадаючых зафіксаваць лепшыя моманты будзе аформлена фота-зона і ўпрагожаны двор з дапамогай АТТ “Лента”. Напрыканцы свята двор ахопяць душэўныя мелодыі ханга!
15:30 –15:40 – Адкрыццё фестываля.
15:40-16:00 – Віншаванне ўдзельнікаў конкурса дзіцячых малюнкаў “Мой двор”.
16:00-16:40 – Лекцыя ўрбаніста Дзмітрыя Бібікава “Як я магу палепшыць свой двор”.
16:40-17:20 – Зялёная экскурсія, якая раскажа, што за расліны ёсць у вашым двары.
17:20-18:00 – Майстар-клас “З нічога” – робім шпакоўні з адкідаў драўлянай вытворчасці.
18:00-18:25 – Музычнае завяршэнне фестывалю – мелодыі хангу.
18:25-18:55 – Майстар-клас ігры на хангу.
Сачыце за навінамі тут.
