Таямніцы мінулага, цікавыя факты, легендарныя асобы, шмат чаго невядомага вам раней з беларускай гісторыі вы зможаце даведацца ад доктара гістарычных навук, прафесара Алеся Краўцэвіча ў новым відэапраекце Budzma.org «Гісторыя за 5 хвілін». У чарговым выпуску гісторык распавядае, як людзі пачалі здабываць метал і рабіць з яго прылады працы і як гэта спрасціла іх жыццё. Раскрываецца таямніца ўзнікнення металургіі на беларускіх землях.
Старажытныя людзі заўважылі, што дзіўныя зеленаватыя камяні (медная руда), трапіўшы ў агонь, расцякаліся, а калі астывалі, захоўвалі форму. Такім чынам зусім выпадкова каля 5 тысяч гадоў таму назад была адкрытая металургія бронзы. Заліўшы растопленую медзь ці бронзу ў пясчаную ці гліняную форму, майстры атрымлівалі патрэбную рэч. А з вопыту бронзавай металургіі вырасла больш складаная тэхналагічна металургія жалеза, якая дала новы штуршок развіцця чалавечай цывілізацыі.
Ведаць гісторыю сваёй Радзімы — абавязак сапраўднага грамадзяніна. Гэтая навука распавядае пра жыццё мінулых пакаленняў, іх ўнутраныя стасункі паміж сабой, знешнія дачыненні з суседзямі. Гісторыя ўказвае на памылкі мінулых часоў і вучыць не рабіць іх наноў.
У гэты няпросты час «Будзьма беларусамі!» прапануе пачаць вывучаць або пашырыць свае веды па гісторыі Беларусі разам з вядомым гісторыкам і археолагам Алесем Краўцэвічам, які зробіць экскурс ад самых старадаўніх часоў нашай мінуўшчыны да атрымання Беларуссю незалежнасці. Вас чакае гісторыя развіцця продкаў сучасных беларусаў, іх культура, гісторыя войнаў, загадкі з жыцця вядомых асобаў і аналітычныя высновы ад Алеся Краўцэвіча пра тое, чаму стужка мінулых часоў у пэўныя моманты паварочвала так, як вядома нам цяпер, а не іначай.
Наступны раз гаворка пойдзе пра часы Жалезнага веку і балцкія плямёны ў Беларусі.
Папярэднія выпускі глядзіце па спасылцы.
Глядзіце яшчэ:
12 войнаў за 300 год. Як і калі нашыя продкі ваявалі з Маскоўскай дзяржавай
