«Тэрмін экспанавання выставы гродзенскага мастака-манументаліста Сяргея Грыневіча "Дэмаграфія" скарочаны. Апошні дзень яе працы — 27 сакавіка (нядзеля) 2022 года да 16.00» — аб’яўляе на сваёй старонцы ў Facebook Палац мастацтва.

Выстава адкрылася 17 сакавіка і мусіла быць да 3 красавіка. Планавалася, што ўвазе гледача будуць прадстаўлены палотны з розных серый, якія ўражваюць новым бачаннем актуальных праблем эпохі.

Аўтарская тэхніка Грыневіча — гэта спалучэнне рэалістычных і абстрактных прыёмаў. Карціны запамінаюцца сваім каларытам, нестандартнай кампазіцыяй, парадаксальным сюжэтам.

Але часткі твораў публіка не ўбачыла, яны не прайшлі цэнзуры. Паглядзець гэтыя карціны можна па спасылцы.

Раней мастак асудзіў вайсковую агрэсію супраць Украіны: «Я патрабую выхаду расійскіх войскаў з тэрыторыі Беларусі. Я хачу, каб мая краіна стала тэрыторыяй бяспекі і не прымала ўдзелу ў агрэсіі супраць Украіны», — напісаў Грыневіч на сваёй старонцы ў Фэйсбуку.

Выставу Сяргея Грыневіча яшчэ можна паспець паглядзець у мінскім Палацы мастацтваў з 11 да 20 гадзін 26 і 26 сакавіка, 27 сакавіка — з 11 да 16 гадзін.

Хто і як з беларускіх мастакоў выказаўся супраць вайны ва Украіне? Чытайце па спасылцы ў нашым матэрыяле.