Чарговае кулінарнае відэа ў межах нашага смачнага праекта раскажа пра рэцэпт добра вядомай стравы, якую вы маглі пакаштаваць у сталовай ці кавярні або прыгатаваць дома, але не так смачна і цікава, як гэта рабілі кухары для вядомага роду Радзівілаў у Нясвіжскім замку. Порцыяй такога гуляшу з гарнірам можна падсілкавацца сярод дня ці паласавацца з блізкімі на вячэру.
Такую страву елі Радзівілы?
Гісторыя замоўчвае, калі ўпершыню нашыя продкі пачалі гатаваць гуляш. Адны лічаць, што гэтую страву паляўнічых гатавалі вельмі даўно, другія — што папулярнай страва стала пры каралі Стэфане Баторыі, які быў венграм, і з ім на нашыя землі прыйшло шмат рэцэптаў з венгерскай кухні. Гэтыя стравы спачатку сталі папулярнымі пры двары і сярод знаці, а пазней некаторыя з іх гатавалі і простыя людзі.
Магнаты ў нашай гісторыі былі вялікімі ласунамі, вядомымі сваімі прыёмамі з пышнымі сталамі з мноствам смакоццяў. Найвялікшымі аматарамі рэдкай кухні былі Радзівілы, а самая разнастайная кухня была ў Нясвіжкай рэзідэнцыі гэтага роду. Адтуль і пайшоў гуляш па-радзівілаўску з расолам, вішнёвым сокам і ляснымі арэхамі. Гэты рэцэпт з кнігі «Наша страва. Сапраўдная беларуская кухня» гісторыка Алеся Белага.
Гатуем «радзівілаўскі» гуляш
Ялавічыну парэзаць буйнымі кубікамі, але яе можна замяніць на любое іншае мяса, якое вам падабаецца: курыца, свініна, бараніна ці дзічына. Кавалкі мяса шчодра пасыпаць мукой і перамяшаць, каб кожны кавалачак быў у муцэ. Разагрэць у сатэйніку алей (можна выкарыстоўваць тлушч, але на ім страва будзе з пэўным прысмакам, што падабаецца не кожнаму). Абсмажыць на алеі мяса, перыядычна памешваючы. Калі пачне выступаць вільгаць — пакласці некалькі лаўровых лістоў, перац гарошкам і гвадзіку. Калі вадкасць пачне булькаць у сатэйніку — уліць палову шклянкі вішнёвага соку, перамяшаць і тушыць каля 40 хвілін. Саліць страву лепш напрыканцы — у яе яшчэ потым дадаецца расол. За гэты час можна зварыць грэчку ці зрабіць пюрэ с бульбы на гарнір. Страву можна падаваць і самастойна, але гарнір дапаможа больш насыціцца і раскрыць смак вішнёвай падліўкі.
Для гуляшу лепш выкарыстоўваць лясныя арэхі або фундук. Арэхі трэба змалоць у ступе. Пакуль мяса тушыцца, прыгатаваць цыбулю для падачы. Яе трэба парэзаць паўкольцамі і на разагрэтым алеі падсмажыць да залацістага колеру.
За 20 хвілін да гатоўнасці дадаць арэхі ў гуляш, за 10 хвілін — 50 грамаў расолу ад агуркоў. Пакуль наш гуляш даходзіць, трэба парэзаць зеляніну. Лепш за ўсё падыходзіць пятрушка, але можна выкарыстоўваць любую іншую.
Гатовы гуляш выкласці на гарнір, паліць падліўкай, зверху пакласці смажаную цыбулю і пасыпаць насечанай зелянінай.
Нам спатрэбіцца на тры порцыі:
Грэчка — 450 грамаў
Мука — 20 грамаў
Цыбуля — 90 грамаў
Лясныя арэхі — 50 грамаў
Алей — дзве сталовыя лыжкі
Вішнёвы сок — 100 грамаў
Расол — 50 грамаў
Лаўровыя лісткі — тры штукі
Перац, гваздзіка і соль — па смаку
Пук зеляніны
Смачна есці!
Больш рэцэптаў серыі «Гатуем з "Будзьма"»
Глядзіце яшчэ:
«Сhampignons de Paris» як у часы Панятоўскага. Марынуем грыбы разам з «Будзьма»
АМ, Budzma.org
