У межах грамадскай культурніцкай кампаніі «Будзьма беларусамі!» у Гародні адбыліся дзве літаратурныя сустрэчы з рэдакцыяй і аўтарамі часопіса «Дзеяслоў».
Першай прымала гасцей з Мінска і Любліна па-восеньску ўпрыгожаная зала гарадзенскага Літаратурнага музея Максіма Багдановіча.
Злева направа: Ала Петрушкевіч, Анатоль Брусевіч, Наталля Русецкая
Да чытачоў і слухачоў прыехала паэтка з Любліна Наталля Русецкая, якая прэзентавала сваю новую кнігу вершаў “Каштаны ў кішэнях”. Зборнік нядаўна пабачыў свет у “Бібліятэчцы часопіса “Дзеяслоў” і ўпершыню быў прадстаўлены на “Вечары з “Дзеясловам” у бары “ДК” у Мінску.
Наталля Русецкая
Анатоль Брусевіч
Выказаць сваё бачанне паэзіі Наталлі Русецкай удалося паэтам з Горадні Анатолю Брусевічу іАле Петрушкевіч, якія пачыталі таксама і свае паэтычныя творы.
Анатоль Івашчанка
Адказны сакратар “Дзеяслова” Анатоль Івашчанка расказаў пра гісторыю і мэты незалежнага літаратурнага часопіса, пазнаёміў прысутных з зместам свежых нумароў часопіса, якія былі падораныя ў фонды музея Максіма Багдановіча. А яшчэ – прачытаў некалькі сваіх вершаў з кнігі “Хай так”.
Таццяна Беланогая
Завершыў вечарыну выступ паэткі і барда Таццяны Беланогай. Пачала яна з песні на верш Максіма Багдановіча “Цёплы вечар, ціхі вецер, свежы стог…”, а таксама расказала пра свой новы альбом песняў на вершы Яўгеніі Янішчыц. Ён запісваецца якраз цяпер і будзе да таго ж змяшчаць запісы аўтарскага чытання самой Янішчыц, знойдзеныя і перададзеныя для апрацоўкі сынам паэткі.
Айцец Павел Каспяровіч і Анатоль Івашчанка
Другая сустрэча адбылася ў даволі нечаканым для беларускіх літаратараў месцы – актавай зале Свята-Пакроўскага сабора. Арганізоўваў вечарыну праваслаўны святар а. Павел Каспяровіч. Дзякуючы яму сустрэча з фармату чытанняў мінскіх і гарадзенскіх паэтаў, які быў прадстаўлены ў багдановіцкім музеі, ператварылася ў дыялог і нават дыскусію, да якой ахвотна далучыліся і гледачы.
Наталля Русецкая
Таццяна Беланогая
Былі абмеркаваныя паэзія і музыка, літаратура і рэлігія, праблемы выдання і распаўсюду беларускіх часопісаў і кніг. Вельмі шмат пытанняў задалі Наталлі Русецкай, цікавіліся станам беларускай філалогіі і славістыкі ў Польшчы, улюбёнымі паэтамі і музыкамі.
Анатоль Івашчанка
Аўтограф ад Анатоля Івашчанкі
Аўтограф ад Таццяны Беланогай
Працягваючы тэму музыкі, Анатоль Івашчанка праспяваў некалькі песень з перакладной “Анталогіі перакладаў расійскай рок-паэзіі”, надрукаванай у №69 часопіса “Дзеяслоў”, а Таццяна Беланогая выканала шэраг сваіх песень і таксама прадставіла пакладзеныя на музыку вершы Яўгеніі Янішчыц.
Напрыканцы аўтары найцікавейшых пытанняў атрымалі сувеніры ад грамадскай культурніцкай кампаніі “Будзьма беларусамі!”.
Прэс-служба ГА “Саюз беларускіх пісьменнікаў”
Чытайце таксама:
