Будзьма беларусамі! » Гістарычная Слонімшчына. Экспедыцыя Таварыства аховы помнікаў

1 чэрвеня бягучага году ў межах агульнанацыянальнай кампаніі “Будзьма беларусамі!” адбылася чарговая экспедыцыя Беларускага добраахвотнага таварыства аховы помнікаў гісторыі і культуры па праверцы стану захаванасці, выяўленню і фіксацыі помнікаў гісторыі і культуры.

Экспедыцыйны маршрут пралягаў па паўднёвай частцы гістарычнай Слонімшчыны, а зараз гэта сутык Баранавіцкага, Слонімскага і Пружанскага раёнаў. Гэта рэгіён, у які ўжо была наладжана вялікая экспедыцыя ў 2012 г., і па яе выніках цэламу шэрагу драўляных цэркваў быў нададзены статус гісторыка-культурнай каштоўнасці, як рэгіянальнай з’яве ў культавым драўляным дойлідстве.

Але далёка не ўсё было вывучана і ахоплена ў мінулым годзе. Таму ў гэты раз былі зафіксаваны для далейшай распрацоўкі прапаноў шматлікія аб’екты традыцыйнага драўлянага культавага дойлідства – цэрквы і капліцы, камяні следавікі і пабудовы былых сядзібна-паркавых ансамбляў.

А ў вв. Юндзілы і Блізная Пружанскага р-на адбыліся сустрэчы з мясцовымі энтузіястамі-краязнаўцамі, вынікам якіх павінна стаць перспектыўная праца па сумеснаму вывучэнню і захаванню гісторыка-культурнай спадчыны.