Распачынаецца падпіска на ўнікальную кнігу доктара гістарычных навук, прафесара Алеся Краўцэвіча «Кароткая гісторыя Беларусі», піша на сваёй старонцы ў facebook Глеб Лабадзенка.

«Галоўная мэта кнігі, каб прачытаўшы 120 старонак і праглядзеўшы 156 ілюстрацый, любы беларус змог уцямна і лагічна за 10 хвілін пераказаць нашу вялікую і слаўную гісторыю. Не задумваючыся, сказаць, хто мы і адкуль мы. Многія беларусы ведаюць нашую гісторыю даволі хаатычна. Асобна Касцюшку, асобна Манюшку, асобна Усяслава Чарадзея, асобна Каліноўскага, асобна Міндоўга, асобна Рагнеду, асобна Радзівілаў, асобна Сапегаў. А звязаць гэта ўсё разам і выбудаваць у адзін ланцуг можа не кожны».

Глеб Лабадзенка зазначае, што «новая кніга Алеся Краўцэвіча проста і лагічна раскладае ўсё па палічках».

«Кніга пачынаецца тым, што першыя людзі з’явіліся на тэрыторыі Беларусі каля 300 тысяч гадоў таму. А сканчаецца атрыманнем незалежнасці Рэспублікай Беларусь. Найноўная гісторыя ў кнізе адмыслова не закранаецца, бо яна пішацца на нашых вачах», - піша Лабадзенка.

Таксама Глеб Лабадзенка адзначае, што «хутчэй за ўсё, кніг будзе надрукавана прыкладна столькі, колькі сабрана папярэдніх замоваў».

«Як атрымаць сабе такую кнігу? Пакуль што спосаб адзін — аформіць папярэднюю падпіску. для гэтага трэба напісаць электронны ліст на адрас knihahistoryja@gmail.com. Падрабязнасці выдаўцы дашлюць лістом ў адказ. чаму варта аформіць папярэднюю падпіску? Выхад кнігі плануецца на красавік-травень 2022 года. На цяперашні момант ужо сканчаецца вёрстка кнігі».