Сёння ў 20:00 у бары «Пагоня» адбудзецца сольны канцэрт спявачкі Ketevan. Квіткі можна набыць папярэдне ў бары ці адразу на ўваходзе перад канцэртам. Кошт квіткоў: 12-15 еўра.
У інстаграме бара спявачка распавяла пра апошні год свайго жыцця і канцэрт:
«У ліпені 2021 я павінна была пакінуць дом у Беларусі і стартанула ў Кіеў. За чатыры месяцы жыцця там, я жыла ў дзевяці розных месцах, у новых людзей, якія цудам з’яўляліся ў маім жыцці. Некалькі канцэртаў (нават на Майдане Незалежнасці, 9 жніўня), канцэрт ў Адэсе, здымкі ў кіно, сустрэчы ў "Карме". Увогуле, Кіеў быў пра людзей і свабоду.
У снежні я паехала спрабаваць жыць у Польшчу. Новая мова, новыя спробы зразумець, што рабіць. Сябры з Беларусі пад’ехалі, запісала песню, пачалася вайна.
З першага дня пайшла валанцёрыць (на тэлефоне, на вакзале, на мяжы). Было важна разумець,што я раблю ўсё, што магу. Цяпер я прыехала ў Вільню. Без планаў. І тут таксама шмат выдатных сяброў! Падумала, што было б цудоўна, каб сабрацца разам. Даўно ўжо не спявалася, ад усяго гэтага. Надышоў момант. Тым больш, што ў мяне ёсць што сказаць. Час быць побач і моцна абняцца»?
Нагадаем, што год таму Кецеван Асраташвілі брала ўдзел у праекце «Словы мацней», які ладзіўся кампаніяй «Будзьма белаусамі!». Паслухайце, як яна чытае верш рэпрэсаванага паэта Ігната Дварчаніна «Покліч».
А ў межах праекта «Zaspiavaj» Кетеван разам з Палінай Рэспублікай выканала песню «Месяц».
