З 1 па 15 жніўня на востраве Кляштар каля Браслава пройдуць археалагічныя раскопкі скляпоў манастыра, вядомага з 1500-х гадоў. 



Манастыр славіўся сваёй цудадзейнай іконай Маці Божай Браслаўскай, Валадаркі Азёраў. Менавіта гэтая славутасць вызначала развіццё мясцовай інфраструктуры. Для шматлікіх паломнікаў на беразе размяшчаліся заязны двор, гандлёвыя рады, ладзіліся кірмашы. У хроніках Рымска-каталіцкай царквы 1774г. ёсць сведчанні цудадзейнага ладу іконы. Каранацыя абраза з'яўляецца для Ватыкана афіцыйным прызнаннем яе цудадзейных уласцівасцяў.

У 1832 годзе ад удару маланкі манастыр згарэў. Ацалеў толькі абраз Божай Маці, які дагэтуль знаходзіцца ў Браслаўскім касцёле. У яе гонар штогод у жніўні праводзяцца святкаванні, на якія прыходзяць, як і 500 гадоў таму, паломнікі з усяго свету.

Раскопкі будуць весціся сіламі валанцёраў у рамках праекта "Востраў Манастыр (Кляштар)" некамерцыйнай арганізацыі "Цэнтр рэгіянальнага развіцця "Браслаў". У аснову праекта ляглі даследаванні браслаўчаніна Канстанціна Шыдлоўскага, а кіраваць раскопкамі будзе вядомы гісторык і археолаг Мікалай Плавінскі.

- Задача праекта - аднавіць гэтае святое месца ў выглядзе, як гэта было паўтысячагоддзя таму, з усімі будынкамі, мостам, гандлёвымі радамі і аўстэрыяй. Наведванне выспы, дэгустацыя манастырскіх страў, начлег у заязным двары дазволяць ўзбагаціць турызм Браслаўскага раёна, - кажа кіраўнік праекта Алёна Шэўчык. - Мы чакаем жадаючых прыняць удзел у гістарычнай падзеі! Выдаткі па транспарце, харчаванню і пражыванню валанцёраў цэнтр бярэ на сябе. На дадзены момант ужо некалькі дзясяткаў чалавек выказалі жаданне дапамагчы. 

У кастрычніку 2018 г. партнёры праекта дайверы дайвінг-клуба "Сталкер" выявілі рэшткі моста, які аб'ядноўваў бераг і востраў. На дадзены момант працягваюцца пошукі манастырскіх званоў, якія таямніча зніклі пасля пажару. 
Для падтрымкі праекта на краўдфандынгавых пляцоўках ідзе збор сродкаў. Арганізатары будуць удзячныя любой дапамозе.

Фота з архіва цэнтра рэгіянальнага развіцця "Браслаў".