Шаноўныя сябры! А давайце разам вызначым, якімі цікавосткамі напоўніць нашыя крамы. Для гэтага кампанія “Будзьма!” запускае “народнае” галасаванне, каб вызначыць пераможцаў конкурсу на найлепшы дызайн!
Нядаўна мы абвясцілі конкурс эскізаў на нацыянальна арыентаваную тэматыку. Да разгляду прымаліся цікавыя, крэатыўныя і сучасныя ідэі, накіды, малюнкі і эскізы, якія можна рэалізаваць у выглядзе прынтоў на цішотках, торбах, кубках, нататніках і іншай візуальнай прадукцыі.
На наш конкурс была дасланая неверагодная колькасць заявак! Журы (а гэта дызайнер Анатоль Лазар, мастачка Дар'я Мандзік, вядомыя рэкламісты Зміцер Вайноўскі і Сяргей Скараход, каардынатаркі кампаніі “Будзьма!” Ніна Шыдлоўская і Алена Макоўская) працавала шмат, адабрала самыя вартыя з дасланых прац, і цяпер справа за вамі! Мы прапаноўваем вашай увазе 10 лепшых прынтоў, з якіх шляхам галасавання і будуць абраныя пераможцы:
1. Андрэй Шнітуленка. “Belarus”
2. Беларускі дзяржаўны архіў навукова-тэхнічнай дакументацыі (Аляксандр Запартыка, Вераніка Мусвідас, Ганна Калтовіч). “Мінскач.Means кач"
3. Дзіна Васілевіч, Ганна Тарановіч. “Будзьма беларусамі! Гэта ў нашых мясцінах”
4. Андрэй Касцюкевіч “1863. Я гаспадар”
5. Павел Дарохін . “Two Storks” style”
6. Андрэй Касцюкевіч “Articulorum Henrico Regi”
7. Алена Макарава. “Лось”
8. Дзіна Васілевіч, Ганна Тарановіч. “Будзьма беларусамі! Гэта ў нашых каранях”
9. Дзіна Васілевіч, Ганна Тарановіч. “Будзьма беларусамі! Гэта ў нашых жылах”
10. Агата Данілава. “Ты хто?”
Галасаванка будзе цягнуцца 7 дзён да 23:59 11 ліпеня.
Вашым меркаваннем будуць вызначаныя 3 пераможцы (1, 2 і, адпаведна, 3 месца).
Першае месца. Дызайн, які набярэ найбольшую колькасць галасоў па выніках “народнага” галасавання, будзе рэалізаваны ў выглядзе прынтоў на цішотках, торбах, кубках або іншай візуальнай прадукцыі. Праца пераможцы абавязкова будзе ўзнагароджаная!
2-е і 3-е месцы. Аўтары дызайнаў, якія па выніках галасавання зоймуць другое і трэцяе месцы, атрымаюць адмысловую прапанову супрацы ад кампаніі “Будзьма беларусамі!”.
Увага! Прагаласаваць можна толькі за адну выяву!
І няхай з вашай дапамогай пераможа найлепшы!
