Калі вы раптам яшчэ не вызначыліся, як цікава і з карысцю правесці выходныя, мы падкажам. Монаспектакль, фартэпіянны канцэрт, майстар-класы, зімовы баль, прэзентацыя кнігі, гуканне вясны — выбірайце мерапрыемствы ў сваім горадзе і на свой густ!

Беларусь

Мінск і Мінская вобласць

Монаспектакль Івана Кірчука «Дарожка мая...» у Мінску

Праграма створана па матэрыялах шматлікіх фальклорна-этнаграфічных экспедыцый у розныя раёны Беларусі! Падчас монаспекталя вы пачуеце больш за 40 народных песен, а таксама фрагменты старадаўніх замоў, якія прагучаць на інтуітыўным разуменні таго, як гэта маглі рабіць нашы продкі.

Ракаў

Фартэпіянны канцэрт у Ракаве

На сядзібе Янушкевічаў у Ракаве — новы цудоўны канцэрт. Таццяна Гаўрылава, Вольга Запольская і Арцём Курань граюць «Зімовы шлях» Шуберта.

Гродна

Беларускі выходны ў Гродне

Вы ведалі, што ў беларусаў ёсць патаемная мова? Гэта арнамент! На лекцыі раскрыюць сімволіку ўзораў і навучаць вас размаўляць, не гаворачы ні слова.

Літва

Вільня

Першая сустрэча гуртка «Беларускі народны строй» у Вільні

Тут будуць разбірацца ў асаблівасцях народных строяў з розных рэгіёнаў Беларусі. Вы пазнаёміцеся з традыцыйным кроем і спосабамі аздаблення вышыўкай, стужкамі і інш.

Зімовы баль-маскарад у Вільні

Рыхтуйце свае самыя святочныя строі, чаравікі, пальчаткі, вееры, пярсцёнкі ды завушнічкі. І вядома ж, рыхтуйце выкшталцоныя маскі. ⠀

У праграме: аповед пра традыцыі баляў беларускай шляхты, фуршэт і салодкі стол, майстар-клас: вучым паланэз, салонныя гульні для дзяцей і дарослых і інш. Завітвайце!

Спектакль «Маналогі жніўня» ў Вільні

Гэты дакументальны спектакль распавядае гісторыю сям’і, пацярпелай ад рэпрэсій, што разгарнуліся пасля пратэстаў 2020-га.

Польшча

Варшава

Прэзентацыя кнігі Віктара Сямашкі «Аўтар мае рацыю заўжды» ў Варшаве

Завітайце ў Старамейскі дом культуры (гэта ў самым цэнтры Варшавы) на творчую сустрэчу з музыкам ды паэтам Віктарам Сямашкам.

Уроцлаў

Адкуль пайшлі беларусы? «Мова Нанова» ва Уроцлаве

Абмяркуюць важнае пытаннечка: адкуль узяліся беларусы. Спікер — Віктар Якубаў, кандыдат гістарычных навук. Прыходзьце даведацца пра ўсё ды нясіце спадару Віктару пытаннечкі!

ЗША

Н’ю-Ёрк

Гуканне вясны ў Н’ю-Ёрку

Калі вам таксама надакучыла зімовая непагадзь, далучайцеся да старадаўняга абраду. Па традыцыйным абрадавым абедзе будуць вадзіць карагоды і прасіць птушак прынесці дoўгачаканую вясну на крылах. Падчас кульмінацыі свята пусцяць па хвалях паўнаводнага Гудзона саламяную ляльку (а з ёю і ўсе свае цёмныя думкі).

Вашынгтон

Дзень роднай мовы ў Вашынгтоне

У праграме суцэльная моўная асалода: цікавыя факты пра беларускую мову, конкурсы і крыжаванкі, невялікая дыктовачка, парады па пашырэнні выкарыстання беларускай мовы, размалёўкі і выразанкі для дзетак, і, канешне, цікавыя размовы і знаёмствы. То далучайцеся! 

Вялікабрытанія

Лондан

Масленіца ў Лондане

У апошні тыдзень перад Вялікім постам у розных рэгіёнах Беларусі традыцыйна пяклі бліны ды пірагі, вадзілі карагоды, гушкаліся на арэлях і спявалі масленічныя песні. То ўсё гэта і будуць рабіць падчас традыцыйнай беларускай Масленіцы ў садзе Скарынаўскай бібліятэкі. Прыносьце бліны і да бліноў – будзе вогнішча, спевы і вясёлая кампанія!

Больш беларускіх падзеяў шукайце ў нашай Афішы.

Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».

Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!

Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!

А па гэтай спасылцы можна знайсці афішу бясплатных мерапрыемстваў.Больш беларускіх падзеяў шукайце ў нашай Афішы.