У Лідскім РАУС на выхадных раптоўна памёр 37-гадовы паэт Дзмітрый Сарокін. Журналіста-фрылансера Яўгена Меркіса асудзілі на 4 гады калоніі ва ўмовах узмоцненага рэжыму, родным памерлага Мікалая Клімовіча агучылі прычыну смерці. Распавядаем апошнія навіны палітвязняў культуры.
29 траўня
Стала вядома, што пастара Аляксандра Зарэцкага паўторна арыштавалі на 15 сутак
Стала вядома, што 12 траўня пастара евангельскай царквы г. Новалукомль Аляксандра Зарэцкага арыштавалі на 15 сутак за распаўсюд «экстрэмісцкіх» матэрыялаў у сацсетках.
Раней, 21 красавіка, ён ужо быў арыштаваны на той жа тэрмін па ч. 2 арт. 19.11 КаАП (Распаўсюд экстрэмісцкіх матэрыялаў).
30 траўня
Журналіста-фрылансера Яўгена Меркіса асудзілі да калоніі
У Гомельскім абласным судзе вынесены прысуд журналісту-фрылансеру і краязнаўцу Яўгену Меркісу. Палітвязня абвінавацілі ў стварэнні экстрэмісцкага фармавання альбо ўдзеле ў ім (ч. 3 арт. 361-1 КК), а таксама ў садзейнічанні экстрэмісцкай дзейнасці (ч. 1 і 2 арт. 361-4 КК). Яўгену прысудзілі 4 гады пазбаўлення волі ў калоніі ва ўмовах узмоцненага рэжыму.
«Экстрэмісцкія» песні
Улады прызналі «экстрэмісцкімі» песні «Пора», «Стражи галактики», «Ненависть» і «Вясна» жлобінскага гурта FaceOFF.
Нагадаем, на мінулым тыдні ўдзельнікаў гурта FaceOFF затрымалі, а пазней адправілі на суткі.
Затрыманы дырэктар маркетынгавага агенцтва Gusarov Андрэй Гусараў.
Стала вядомая дата суда над Настай Лойкай
Праваабаронцу Насту Лойку пачнуць судзіць 13 чэрвеня. Справу будуць разглядаць у Мінскім гарадскім судзе.
Праваабаронцу затрымалі 28 кастрычніка 2022 года. Насту абвінавачваюць паводле ч. 3 арт. 130 КК (распальванне іншай сацыяльнай варожасці). Падставай для гэтага зрабіўся нібыта ўдзел праваабаронцы ў напісанні справаздачы аб пераследзе анархісцкай супольнасці ў Беларусі за 2018 год: у дакладзе даецца крытычная ацэнка дзейнасці супрацоўнікаў міліцыі.
31 траўня
Ларыса Шчыракова ўпершыню сустрэлася з сынам у СІЗА
Гомельскай журналістцы і краязнаўцы Ларысе Шчыраковай 30 траўня дазволілі кароткатэрміновае спатканне з роднымі, на якое хадзіў і яе шаснаццацігадовы сын Святаслаў.
Нагадаем, Ларысу затрымалі ў снежні 2022-га — супраць яе распачалі крымінальную справу паводле арт. 369-1 КК (дыскрэдытацыя Рэспублікі Беларусь).
1 чэрвеня
Яну Цэглу асудзілі на два гады «хатняй хіміі»
У судзе Цэнтральнага раёна Мінска на два гады «хатняй хіміі» асудзілі пісьменніцу Яну Цэглу паводле ч. 1 арт. 342 КК (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх).
Яна — пісьменніца, аўтарка казак. Скончыла гістарычны факультэт БДУ. Вучылася ў літаратурнай школе Адама Глобуса. Апошні год дзяўчына працавала журналісткай ў ЛіМе (Літаратура і мастацтва). Яна заснавала часопіс маладога беларускага мастацтва «Маскарад».
Алена Анісім выйшла на волю пасля 12 сутак арышту
Экс-дэпутатка Палаты прадстаўнікоў і былая старшыня Таварыства беларускай мовы Алена Анісім адбыла адміністрацыйны арышт за «дробнае хуліганства» — нібыта яна ў РУУС Першамайскага раёна Мінска «крычала, размахвала рукамі, паводзіла сябе агрэсіўна, на просьбы супакоіцца не рэагавала». За час арышту яе звольнілі з Акадэміі навук.
Завяршылася праверка па факце смерці Мікалая Клімовіча
Сваякам памерлага ў зняволенні палітвязня паведамілі, што адбылася праверка па факце яго смерці 6 траўня ў віцебскай калоніі № 3. Родным памерлага было сказана пра тое, што вінаватых асобаў не выяўлена, а прычынай смерці — стаў стан здароўя Мікалая Клімовіча.
2 чэрвеня
У Мінску асудзілі навукоўца і прафсаюзнага актывіста Аляксандра Кандрацюка
Мінскі гарадскі суд абвясціў прысуд навуковаму супрацоўніку Інстытута генетыкі і цыталогіі Нацыянальнай акадэміі навук РБ, прафсаюзнаму актывісту Аляксандру Кандрацюку — тры з паловай гады ў калоніі ва ўмовах агульнага рэжыму. Яго абвінавацілі па трох артыкулах Крымінальнага кодэкса — ч. 1 арт. 130 (распальванне сацыяльнай варожасці альбо варажнечы), арт. 368 (абраза) і ч. 1 арт. 369 (дыскрэдытацыя Рэспублікі Беларусь).
Актывіста затрымалі разам з некалькімі супрацоўнікамі Інстытута генетыкі і цыталогіі НАН РБ 5 верасня 2022 года. Ён атрымаў 13 сутак адміністрацыйнага арышту, але на волю больш не выйшаў.
Стала вядома, што ў палітзняволенай Аксаны Зарэцкай быў нервовы зрыў
Па інфармацыі праваабаронцаў, трэнерка па этыкеце пасля абвяшчэння прысуду адчула сябе дрэнна, яе шпіталізавалі. Праз нейкі час яе вярнулі на «Валадарку».
Журналіста Сяргея Сацука перавялі ў калоніі на «лёгкую працу». Пра гэта паведаміў брат журналіста. Нагадаем, журналісту прысудзілі 8 гадоў калоніі.
Грэка-каталіцкаму святару Аляксандру Шаўцову дадалі 30 сутак арышту
Суд у Полацку асудзіў протапрэзбітара паводле артыкулаў 19.11 і 24.23 КаАП. Да папярэдняга прысуду дадалі 30 сутак і такім чынам святар правядзе за кратамі 45 дзён.
Гэта азначае, што Шайцоў будзе вызвалены 8-га ліпеня, праз тыдзень пасля найважнейшага фэсту Маці Божай Будслаўскай, апякункі Беларусі.
Затрыманы гродзенскі фатограф Яўген Бузук
Яго абвінавачваюць у тым, што пасля пачатку вайны ён ездзіў дапамагаць бежанцам на польска-украінскую мяжу.
Памёр паэт Дзмітрый Сарокін
У Лідскім РАУС на выхадных раптоўна памёр 37-гадовы мясцовы паэт, удзельнік фестываляў сучаснага мастацтва Дзмітрый Сарокін.
Прычына, па якой Дзмітрый Сарокін апынуўся ў РАУС, невядомая. Аднак, як распавёў знаёмы Дзмітрыя, сілавікі затрымлівалі яго раней і здымалі з ім відэа.
Прычына смерці Дзмітрыя невядомая. Пахаванне прызначана на аўторак.
